Nuce Logo

ئەمڕۆ سێشەممە (18/ ئادار/ 2025) ماڵپەڕى (عەرەبى 21) بڵاوى کردەوە، ئاماتسیا بەرعام، پسپۆڕى ئیسرائیلى لە کاروبارى رۆژهەڵاتى ناوەڕاست جەخت لەسەر ئەوە دەکاتەوە، بەرژەوەندى هاوبەش لەنێوان هەر سێ وڵات رێگر دەبێت حزبوڵڵا دووبارە خۆى لە رێگەى ئێرانەوە بەخاکى سووریا خۆى پڕ چەک بکاتەوە.
ئەو پسپۆڕە دەشڵێت، ئیسرائیل بەردەوام کار لەسەر رێگرى گواستنەوەى چەک لە ئێرانەوە بۆ حزبوڵڵا بە رێگەى عێراقەوە دەکات، ئەوەش بۆ تەلئەبیب بەرژەوەندییەکى گرنگە، سەبارەت بە ئەحمەد شەرعیش، ئەو پرسە بایەخى زیاترە، چونکە ئەگەر لەو رێگرییە شکست بهێنێت، ئەوە یەکسان دەبێت بە کۆتاییهاتنى.
بەرعام جەخت لەسەر ئەوەش دەکاتەوە، ئەو کارە پەیوەست نییە بە داواکردنى هەماهەنگى ئاشکرا لەگەڵ کەسێک کە بە "تیرۆرست داندراوە" بەڵکوو پەیوەستە بە تێگەیشتنى بەرژەوەندییە تێکەڵە هەرێمییەکان، ئەگەریش هەیە ئەحمەد شەرع ئامادەیى ئەوەى تێدابێت بە لەسەرەخۆیى و بە مەرجى نهێنیبوونى ئەو هەماهەنگییە هاوکار بێت، چونکە لە ئەگەرى ئامادەیى بۆ وڵاتەکەى دەبێتە شەرمەزاریى.
ئەو پسپۆڕە ئاماژە بەوەش دەکات حکومەتى نوێى لوبنانیش بەرژەوەندى لەوە داهەیە رێگرى لە حزبوڵڵا بکرێت، روونیشى دەکاتەوە، لە لوبنان سەرۆکى وڵات و سەرۆک وەزیران و حکومەت و بەپرسانى دەزگا ئەمنییەکان نوێن، ئەو حکومەتەش بەرژەوەندى گەورە و روونى لە رێگرى لە گەڕانەوەى چەکدارکردنى حزبوڵڵا هەیە.
ئاماتسیا باس لەوە دەکات، گۆڕانکارى ئێستاى هەرێمى بەرژەوەندى سێلایەنەى بێپێشینەى لەنێوان حکومەتى ئیسرائیل و حکومەتى نوێى لوبنان ئەحمەد شەرع لە سووریا درووست کردووە، سەرەڕاى هەموو ململانێ و دوژمنکارییەکان بەڵام ئامانجێکى هاوبەش هەیە پێویستە بە جدى کارى لەسەر بکرێت.
لە چەند رۆژى رابردوو لەسەر سنوورى لوبنان سێ سەربازیى سووریا کوژران، وەزارەتى بەرگرى سووریاش حزبوڵڵا بە رفاندن و کوشتنى ئەندامەکانى تۆمەت بارکرد، جەختیش لەسەر گرتنەبەرى هەموو رێکارێکى پێویست دەگرینەبەر دواى ئەو هێرشەى حزبوڵڵا بۆ سەر سەربازانمان.
لە بەرانبەریشدا حزبوڵڵا بە رەهاى رەتى کردەوە، هیچ پەیوەندییەکیان بە رووداوەکانى سەر سنوورى سووریاوە هەبێت.