سەرۆك نێچیرڤان بارزانی بۆ ئەفسەرانی كوردستان: هیچ کات نەبنە لایەنێک لە کێشە و ناکۆکییە سیاسییەکان
نوچە نێت
ئەمڕۆ پێنجشەممە (17/ئەیلوول/2024) بە بەشداریی سەرۆك نێچیرڤان بارزانی، سەرۆكی هەرێمی كوردستان و فەرماندەی گشتیی هێزی پێشمەرگەی كوردستان، ڕێوڕەسمی دەرچوونی ئەفسەرانی خولی (29)ـی كۆلێژی سەربازیی دووەمی زاخۆ بەڕێوەچوو و تێیدا وتارێكی پێشكەش كرد.
سەرۆكی هەرێمی كوردستان لە وتارەكەیدا ڕایگەیاند، ''جێگەی ده‌ستخۆشى و سه‌رفرازییەکی گەورەیە کە دوای ئەوەی خوێندنی خۆتان لە زانکۆ تەواو کرد، بە خواستی خۆتان هاتن تاوەکو خوێندنی سەربازیش تێپەڕێنن و ببنە ئەفسەری پێشمەرگە، ئەوە دەرخەری حەز و دڵسۆزیی ئێوەیە بۆ خزمەتکردنی کوردستان.''
سەرۆکی هەرێمی کوردستان ئەوەشی خستەڕوو، ''لەو رۆژەوەی ناوی پێشمەرگە هەیە، باوەڕی کورد و کوردستان بە خۆی، بە دۆزی خۆی و مافە رەواکانی خۆی پتەو و پتەوتر بووە.''
سەبارەت بە ڕۆڵ و قارەمانیێتیی پێشمەرگە لە شەڕی داعش ئاماژەی بەوە كرد، ''ئەوە پێشمەرگە بوو لە بەرەکانی شەڕ، بە گیان و خوێنی خۆی ئەفسانەی داعشی تێکشکاند و رێگەی نەدا کوردستان بکەوێتە دەست تیرۆریستان.''
دەقی وتارەكەی سەرۆك نێچیرڤان بارزانی فەرماندەی گشتیی هێزی پێشمەرگەی كوردستان:
ده‌رچوویێت خۆشتڤى،
ئاماده‌بوویێت هێژا،
ڕۆژ باش.. هوین هه‌مى گه‌له‌ك ب خێر هاتن سەرچاڤا..
گه‌له‌ك خۆشحالم كو دگه‌ل هه‌وه‌یێن ڕێزدار، به‌شدارییا ده‌رچوونا خولا (29)ێ یا پێگه‌هاندنا كۆلێژا سه‌ربازى یا دو یا زاخۆ دكه‌م. ئه‌ڤ دیمه‌نه بۆ مه و بۆ هه‌مى خه‌لكێ كوردستانێ، جهێ شانازیێیه كو (792) ئه‌فسه‌رێت مه یێت گه‌نج، خویندنا خۆ یا سه‌ربازى، یا ئه‌كادیمى و پراكتیكى بدویماهى تینن.
جهێ ده‌ستخۆشى و سه‌ربلندییه‌كا مهزنه، پشتى كو هه‌وه خویندنا خۆیا زانكۆیى بدویماهى ئیناى، هوین ب خواست و ڤیانا خۆ هاتى، داكو خویندنا سه‌ربازى ژى بدویماهى بینن و ببنه ئه‌فسه‌رێت پێشمه‌رگه‌ى. ئه‌ڤ ناڤ نیشانێ حه‌زكرن و دلسۆزییا هه‌وه بۆ خزمه‌تێ و بۆ كوردستانێ نیشا ددەت. هه‌ر بژین، هه‌ر سه‌ركه‌فتى بن.
یا زێده جهێ خۆشحالیێ، دناڤ ڤان دەرچوویادا، (50) كچێت كوردستانێ، (13) ئێزدى و ده‌رچوویه‌كێ كاكه‌یى هه‌نه. ئه‌ڤه دلخۆشییەكا مه هه‌میانه. ب گه‌رمى و ب دل پیرۆزباهیێ ل هه‌وه هه‌میا دكەم، ل مالبات و كه‌سوكارێت هه‌وه دكه‌م كو ئەڤرۆ د ڤێ مەراسیمێدا دگەل مە بەشدارن، پیرۆز بیت ل وان، پیرۆز بیت ل هەوە، هیڤییا سەركەفتنێ بۆ وە دخوازم.
ئەز ژی دگەل مالباتێت هەوە ئەڤرۆ ڤێ ئاهەنگێ دگێڕین و پر ب دل شانازیێ ب وە دكەم، ئەو شانازییا كو مالباتێت وە ب هەوە دكەن، ئەز ژی ل جهێ خۆ شانازیێ ب هنگۆ دكەم و ب ئانەهییا خودێ هەر سەركەفتی و سه‌رفه‌راز بن و د ژیانا خۆ دا.
من دڤێت ئەز تشتەكێ ژی ببێژم، دناڤ مەدا ئەڤرۆ كەسەك ئامادەیە كو وەكی باب یێ بەشدارە د ڤێ مەراسیمێدا، ئەو ژی فەرماندەیەكێ مە بوو كو خزمەتەكا مەزن یا كوردستانێ كر و مخابن ل شەڕێ ئازادییا عێراقێ بریندار بوو، ئەم هەمی پێكڤە بە چەپلەیەكی بخێرهاتنێ ب وەجی بارزانی دكەین كو دگەل مە یێ بەشدارە.
ئەز ژی وەكی مالبات چەوا مالباتا وە ئەڤرۆ لێرە د ئامادەنە ئێك ب ئێك یێت هنگۆ شانازیێ ب هنگۆ دكەن، ئەز ژی وەكی مالبات دێ بێژمێ، مام ئەم شانازیێ ب تە دكەین چونكی ئێك ل وان قوتابیی یێت دەرچوو ئەڤرۆ لێرە هەی كوڕێ وی یە و كوڕێ خۆ یێ پەروەردە كری و یێ فێر كری كو ئەو ژی لسەر ڤێ ڕێكێ یێ بەردەوام بیت، ئەو ڕێكا كو بابێ وی گرتی و تێدا بۆ ئازادییا عێراقێ و سەرفەرازییا مللەتێ مە بریندار بووی، كوڕێ خۆ ژی یێ پەروەردە كری كو لسەر وێ ڕێكێ یێ بەردەوام بیت، هنگ هەمی ڤێكڕا تەمەندرێژ و سه‌رفه‌رزان و سەركەفتی بن و مامێ وەجی تو ژی گەلەك بخێرهاتی سەرچاڤا و سەر سەرا و یێ پشتڕاست بە كو ماندیبوونا تە بۆ خزمەتا لەشكرێ كوردستانێ، ئەو ماندیبوونا تە كری هەمی گاڤا وەكی بەرپەڕەكێ زێڕین دێ ل خەباتا پێشمەرگایەتیێ و كوردستانێ هێتە نڤێسین و ئەم هەمی شانازیێ ب تە دكەین و هیڤیا سەركەفتنێ بۆ هەوە هەمیا دخوازم. هیڤیدارم جارا بهێت ژمارا ئافرەتا د ڤان خولادا زێدەتر ببیت.
گه‌لى ده‌رچوویێت هێژا،
ژ ڕۆژا كو هه‌یه و هه‌تا ئه‌ڤرۆ، پێشمه‌رگایه‌تى جهێ شانازى و شه‌ره‌فمه‌ندیێ و به‌رپرسیاریه‌تییەكا مه‌زن بوویه. ژ ڕۆژا كو ناڤێ پێشمه‌رگه‌ى هه‌یه و هه‌تا ئه‌ڤرۆ، باوه‌رییا كورد و كوردستانێ بخۆ، ب دۆزا خۆ و ب مافێت خۆ یێت ڕه‌وا، هه‌ر موكوم و ڕۆژ ب ڕۆژ ژی موكومتر كریە.
پێشمه‌رگایه‌تى، ئه‌ركه‌كێ گه‌له‌كێ پیرۆزه، به‌شه‌كێ گرنگ یێ ناسناما نیشتمانى و یا نه‌ته‌وه‌یى یا كوردستانێ یه. به‌رده‌وامییا كاروانه‌كێ دویر و درێژێ خه‌بات و تێكۆشینێیه بۆ پاراستنا مللەتێ مە، بۆ پاراستنا كوردستانییا. ژبه‌ر هندێ ژى، ده‌رچوونا هه‌وه یا ئه‌ڤرۆ، سه‌ركه‌فتن و بدویماهى ئینانا خویندنێ، دویماهیا ڕێكێ نییه.
نه‌خێر،
ئه‌ڤرۆ، ئەو تشتێ ئەڤرۆ هنگ دەسپێدكەن، خزمه‌ت و ئه‌ركێ هه‌وه یێ نوییه دگه‌ل دامودەزگەهێت حكوومەتێ بۆ كوردستانێ. ئه‌ڤ ئه‌ركه بۆ هەوە و بۆ مە هەمییا شانازییەكا مەزنە. هه‌یاما (9) هه‌یڤێت چوویى یێت مه‌شق و ڕاهێنان و فێربوونێ، هه‌وه ئه‌زموونه‌كا ده‌وڵه‌مه‌ند وه‌رگرت، داكو ئه‌ڤرۆ بشێن خزمه‌تا وه‌لاتێ خۆ بكه‌ن.
باوه‌ڕ‌ناما هه‌وه، هه‌ر بتنێ ده‌سكه‌فته‌كێ ئه‌كادیمى نییه، په‌یمانا شه‌ره‌فمه‌ندیێ و سیمبۆلا دلسۆزیێ و وه‌فاداریێ و ئه‌مانه‌ته‌كێ مهزنه بۆ خزمه‌تا ملله‌تێ خۆ و بۆ خزمەتا وه‌لاتێ خۆ. نیشانێ ئاماده‌یى و حازرییا هه‌وه‌یه بۆ هه‌ر قوربانیدانه‌كێ د ڕێكا وەلاتیدا.
د دیرۆكا بزاڤا ڕزگاریخازا گه‌لێ كوردستانێدا، پێشمه‌رگەی قوربانى یێت گه‌له‌ك مه‌زن دانه. ب هێزا پێشمەرگا، ڕوحا خۆڕاگری، خوینا خۆ دایە و ڕوحا بەرخۆدانێ بەرجەستە كرییە، داكو هەمی جارا به‌ره‌ڤانیێ ل ئاخا كوردستانێ، ل دۆزا ملله‌تێ خۆ بكه‌ن. هەمی دیرۆكا پێشمەرگاتیێ قەهرەمانی و مێرخاسی و قوربانیدانێت مەزن بۆ ئازادیێ و بۆ شكۆمەندییا كوردستانێ، سه‌رێ خۆ یێ داناى، به‌لێ هیچ وەختەكی خۆ بۆ دوژمنى نه‌چه‌ماندییه.
ڤێ دویماهیێ كو مه‌زنترین ڕێكخراوا تیرۆریستی ل جیهانێ ب سه‌ر عێراقێ و كوردستانێدا گرتى، پێشمه‌رگه بوو ل به‌رۆكێت شه‌ڕى، ب گیانێ خۆ و خەباتا خۆ، ئه‌فسانه‌یا داعشێ تێكشكاندى. ڕێ نه‌دا كوردستان بكه‌ڤیته ده‌ستێ تیرۆرستا. له‌وما، هندى كورد و كوردستان هه‌بن، پێشمه‌رگه دێ هه‌ر مینیت ئیلهامبه‌خش و پارێزڤانێ گه‌لێ كوردستانێ و دێ مینیت سیمبۆلا خۆڕاگرى و به‌رخودانێ. لێرەدا ئەم بەژنا خۆ دچەمینین بۆ خوینا وان شەهیدا، ئەوێت كو د ڤێ ڕێكێدا خەبات كری و گیانێ خۆ كرییە قوربانی.
د ڤێ هه‌لكه‌فتنێدا، من دڤێت جاره‌كا دى، سوپاس و پێزانینێت هه‌رێما كوردستانێ بگه‌هینمه هێزێت هه‌ڤپه‌یمانییا نێڤده‌وله‌تى كو د شه‌ڕێ داعشێدا پشته‌ڤانییا پێشمه‌رگا كر. هاریكاریا وان بۆ پێشمه‌رگا و هەروەستا هاریكارییا وان بۆ سوپایێ عێراقێ، یا ستراتیژى و یا ئێكلاكه‌رەڤە بوو. نموونه‌كێ زندى یێ هاریكارییا نێڤده‌وله‌تى بوو، بۆ به‌رهنگارییا ئەو ته‌حه‌دا یێت مەزنێت هه‌ڤپشك كو هاتنە د ڕێكا مەدا.
هه‌روه‌سا گرنگه به‌حسێ هه‌ماهه‌نگى و هاریكارییا ناڤبه‌را پێشمه‌رگا و هێزێت سوپایێ عیراقی بكەین به‌رامبه‌رى تیرۆرستا. ب تایبەتی ئەو كارێ پێكڤە یێ كو مە هەردوولایا پێشمەرگە و سوپایێ عێراقێ هێزێت حەشدا شەعبی ڤێكڕا كری بتایبه‌تى ل ده‌ڤه‌رێت ماده‌یا (140)، كو جهەكە مە ڤێكڕا كار كر دگەل سوپایێ عێراقێ بۆ بەرقەراركرنا ئاسایشێ و ئارامیێ و تەناهیێ. هەر ئەڤرۆ و د ڤێ هەلكەفێدا جارەكا دی ئەم سەرێ ڕێزێ بۆ خوینا وان شەهیدا دچەمینین ئەوێت كو د بەرگریكردن ل عێراقێ گیانێ خۆ فیدا كری چ سوپایێ عێراقێ بیت، چ حەشدا شەعبی بیت و چ پێشمەرگە بن. ب باوەرییا مە داعش هێشتا داعش گه‌ف و مه‌ترسییه‌كا جددییه لسه‌ر ئاسایش و ئێمناهییا عێراقێ و ڤێ ده‌ڤه‌رێ.
ژبه‌ر هندێ گه‌له‌ك گرنگە و گەلەك ژی پێدڤییه هاریكارییا به‌رده‌وام هەبیت دناڤبەرا سوپایێ عێراقێ و هێزێت پێشمەرگەیدا، دڤێت ئەڤ كاریكاری و هەڤكاری بەردەوام بیت و بلا بیرا مە بهێت كو مە هەمییا ڤێكڕا خوین یا دای بۆ بەرگریكرنێ ل عێراق و كوردستانێ. ئەز هیڤیدارم ئەڤ هاریكارییا بەردەواما مە، ئەنجامێ وێ تەناهییەكا سەرتاسەری بیت بۆ عێراقێ و پاشەڕۆژەكا گەش بۆ عێراقێ و بۆ كوردستانێ و بۆ هەمی خەلكێ كو ل عێراقێ دژین. پێشمه‌رگه به‌شه‌كه ژ سیسته‌مێ عێراقێ یێ به‌ڕه‌ڤانیێ، له‌وما چاڤەڕێ تێتە كرن عێراق ئەركێ خۆ یێ یاسایی ل بەرامبەر پێشمەرگەی جی بجی بكەت و پشتەڤان بیت و چه‌كداركرنا پێشمه‌رگه‌ى، جێبه‌جێ بكه‌ت. پێشمەرگە مەترسی نییە، پێشمەرگە بەرگریكارە ل عێراقێ و ل كوردستانێ و ل مرۆڤایەتیێ.
سوپاس و پێزانین و ده‌ستخۆشى بۆ هێزێت ئه‌مه‌ریكا و دۆستێت مه یێت دى یێت هه‌ڤپه‌یمانییا نێڤده‌وله‌تى، بۆ پشتگیرییا وان یا به‌رده‌وام ل پرۆسا چاكسازیێ یا وهزارهتا كاروبارێت پێشمه‌رگه‌ى بۆ ڕێكخستنه‌ڤه و ئێككرنا هێزێت پێشمه‌رگه‌ى.
ئه‌ڤ پرۆسه‌‌یە نه وه‌كى مه دڤێت، و نە وەكی وان دڤێت، لدویڤ تمووحێت مهنییە. كێشه یێت هه‌ى و هێدى یا بڕێڤه دچیت. پێدڤییه ئه‌م هه‌مى لایه‌ك كاره‌كێ جددى بكه‌ین و ڤێ پرۆسێ سه‌ربێخین. چێنابیت ئه‌م دۆست و هه‌ڤپه‌یمانێت خۆ كو ب جددی كار دكەن بۆ ئێكگرتنا هێزێت پێشمەرگەی، بێ ئومێد بكه‌ین.
بۆ ڤێ چه‌ندێ، پەیاما من بۆ دۆستێت مە یێت هەڤپەیمان ئەڤەیە، ئەم دێ بێژینە وان ڕاستە ئەڤ پرۆسە یا هێدی بڕێڤە دچیت، بەلێ ئیرادەكا جددی مە یا هەی بۆ هندێ هێزێت پێشمەرگە بكەینە هێزەكا نیشتمانی یا كوردستانی و مە دێ ئێك هێز هەبیت و ئێك وەزارەت دێ هەبیت و ئێك سەركردایەتی دێ هەبیت بۆ بڕێڤەبرنا پێشمەرگەی. گاڤ ب گاڤ دێ هه‌مى ئاسته‌نگ و ئاریشا چاره‌سه‌ر كه‌ین، هه‌تا ب ئانەهیا خودێ دگه‌هیته دویماهییا ڤێ پرۆسێ.
ئه‌م بدروستى پابه‌ندین كو له‌شكره‌كێ ئێكگرتى یێ پێشمه‌رگه‌ى هه‌بیت. له‌شكره‌كێ نیشتمانى بیت كو دبن ڕێڤه‌به‌رى و كۆنترۆلا حكوومەتا هەرێما كوردستانێ و وهزارهتا پێشمه‌رگه‌ى دا بیت.
ده‌رچوویێت هێژا،
ژبیر نه‌كه‌ن، كۆلێژا سه‌ربازى یا زاخۆ، هوین یێت په‌روه‌رده كرى و پێگه‌هاندى، داكو وه‌كى فه‌رماندێت زانا و خودان شیان، دگه‌ل پاراستنا كوردستانێ، دادپه‌روه‌ریێ و مرۆڤاهیێ ژى بپارێزن. پره‌نسیپ و ڕه‌وشتێت بلند یێتنیشتمانپه‌ره‌وریێ، قوربانیدان و دیسپلین، ئه‌و بنه‌مایێت سه‌ره‌كینه كو پێدڤییه هه‌رگاڤ د هزر و دلێ وه‌دا بمینن و بەردەوام بیر ل ڤان پرەنسیپا بكەنەڤە.
ب خویندن و په‌روه‌رده و فێربوونا هه‌وه ل ڤێ كۆلێژا سه‌ربازى، ب وانه‌یێت وه‌لاتپارێزى و دلسۆزیێ بۆ ئه‌ركێ خۆ و بۆ ئاخا خۆ، نه هه‌ر دناڤ ڕێزێت پێشمه‌رگه‌یدا، هوین د ناڤ هه‌مى جڤاكێدا، دشێن ڕۆله‌كێ جدا و گرنگ بگێڕن. هون دشێن ببنه نموونه و ئیلهامبه‌خشێت نڤشێت داهاتى، بۆ پاشه‌ڕۆژه‌كا باشتر.
ڕۆلێ هه‌وه نه بتنێ یێ مه‌یدان و قادێت شه‌ڕییه، به‌لكى ئه‌ركێ هه‌وه دڤێت مه‌زنتر بیت بۆ ئاڤاكرنا جڤاكه‌كا ئارام و ته‌نا بیت. هه‌روه‌سا به‌ر‌پرسیارییه‌كا هه‌وه یا دى، ئه‌وه كو به‌هایێت دیموكراسیێ و مافێت مرۆڤى بپارێزن. كار بكه‌ن داكو گرنگییا ڤا به‌هایا دناڤ جڤاكێدا زێدەتر به‌لاڤ ببیت. هون ببنه نموونه‌یه‌ك بۆ پاراستنا دادپه‌روه‌ریێ و پێكڤەبوونێ و به‌ڕه‌ڤانیێ ل مافێت هەمی هه‌ڤوه‌لاتی یێت هەرێما كوردستانێ.
مه هه‌میا باوه‌رى یا ب هه‌وه هه‌ى كو دێ شێن به‌رامبه‌ر ته‌حه‌دیا ڕاوه‌ستن و د ئه‌ركێ خۆدا سه‌ركه‌ڤن، داكو ب باشترین شێوه خزمه‌تا وەلاتێ خۆ بكه‌ن. داكو د چارچۆڤه‌یا وهزارهتا كاروبارێت پێشمه‌رگه‌یدا، هێزا نیشتمانییا كوردستانێ بن. چ جارا نه‌بنه ته‌ره‌ف، د كێشه و ناكۆكى یێت سیاسیدا.
ئاماده‌بوویێت هێژا،
هه‌ر د ڤێ ده‌لیڤێدا، ده‌رباره‌ى ڕه‌وشا ئالۆز یا ڕۆژهه‌تا ناڤین، من دڤێت ته‌ئكیدێ لسه‌ر هه‌لوێستا هه‌رێما كوردستانێ بكه‌م كو ئه‌م دگه‌ل ڕاوه‌ستیانا شه‌ڕى و چاره‌سه‌ركرنا ئاشتیانەینە یا هه‌مى كێشه و ئاریشان. مه ب هیچ ڕه‌نگه‌كى نه‌ڤێت هه‌رێما كوردستانێ و عێراق، بكه‌ڤنه ناڤ ڤان ئالۆزییا. دڤێت هه‌مى هه‌ول بێنه دان، داكو ڕه‌وش ئالۆزتر نه‌بێت.
ل دویماهیێ، سوپاس و پێزانین و ده‌ستخۆشییه‌كا تایبه‌ت بۆ مامۆستا و به‌ر‌پرسیار و ڕێڤه‌به‌رێت كۆلێژا سه‌ربازى یا دو یا زاخۆ. كار و خزمه‌ت و ماندیبوونا وان، جهێ ڕێزه‌كا مهزنه. ئه‌ركێ وان پیرۆزه و ڕۆلێ وان گه‌له‌كێ گرنگه بۆ باشتركرن و به‌ره‌ڤپێشبرنا ئه‌ركێ پێشمه‌رگه‌ى، بۆ پێگه‌هاندنا نڤشه‌كێ وه‌لاتپارێز لسه‌ر بنه‌مایێ زانستێت سه‌ربازى و ئینتیما و ڤیانا وه‌لاتى.
ئه‌رك و خزمه‌تا كو هوین دكه‌ن، ئاڤاكرنا كۆلێژ و ئه‌كادیمى یێت سه‌ربازى، باشترین وه‌فادارییه بۆ خه‌بات و قوربانیدان و ڕۆلێ دیرۆكى یێ پێشمه‌رگا، بۆ هندێ دا پشتڕاست ببن كو پاشه‌ڕۆژا پێشمه‌رگا دێ یا باشتر بیت.
سلاڤ و ڕێز و دروود بۆ گیانێ پاقژێ هه‌مى شه‌هیدا، ئەڤێت كو بۆ كوردستانێ خەبات كری و سەر دانای. سلاڤ بۆ شه‌هیدێت زندى، بۆ هه‌مى وانقه‌هره‌مانێت كو د ئه‌ركێ پاراستنا كوردستانیدا بریندار بووى. ئەم دبێژینە وان، خزمەتا وە و خەباتا وە مە یا لبەر چاڤە.
هنگ قوتابی یێت خۆشتڤی، هەر سەركەفتی بن و هیڤییا من پاشەڕۆژەكا گەشە بۆ وە هەمیا و جارەكا دی پر ب دل پیرۆزباهییەكا گەرم ل وە هەمیا دكەم و سەركەفتی بن د ژیانا خۆدا.
زۆر سوپاس.
.jpg)
.jpg)
.jpg)
0 لێدوانەکان
Karla Gleichauf
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
M Shyamalan
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
Liz Montano
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment