Nuce Logo

وەرگێرانی: ئیسماعیل تەها

هێڵی گازی قوبرسی بۆ میسر ئاراستەیەكی دەچێتە قۆناغێكی نوێ، ئەوەش لەسایەی سووربوونی قاهیرەیە بۆ سوودوەرگرتن لە یەدەگی دۆزراوە تازەكان، كە دەیەوێت لە میانەی گواستنەوەی گازی قوبرس بۆ وڵاتەكەی، بۆ دابینكردنی پێداویستی ناوخۆیی وزە و رەوانەكردنی بۆ بازاڕەكانی جیهان سوودی لێوربگرێت.

بەگوێرەی ئەو داتایانەی كە "سەكۆی وزە" كە بارەگاكەی لە واشنتنە دەستی كەوتووە، لە (2025/3/16) عەبدولفەتاح سیسی، سەرۆكی میسر لەگەڵ ئەنجوومەنی وەزیران بەسەرۆكایەتی د.مستەفا مەدبولی، سەرۆكی ئەنجوومەن و ئەندازیار كەریم بەدەوی، وەزیری وزە و سامانی ژێر زەوی وڵاتەكەی كۆبوونەتەوە.

لەو كۆبوونەوە گفتوگۆ لەسەر لایەنەكانی هەماهەنگی لەگەڵ قوبرس لە بواری گاز و بەهێزكردنی سوودوەرگرتن لە یەدەگی دۆزراوە لە ناوچە ئابوورییەكانی قوبرس و بەتایبەتیش لە كێڵگەی كرۆنوس و ئەفرۆدیت كردووە.

بەشداربووان گفتوگۆیان لەسەر گواستەوەی گازی قوبرس بۆ میسر كردووە، بەتایبەت كە ئەو وڵاتە خاوەنی توانای جۆراوجۆرە، ئەوەش بە ئامانجی قۆستنەوەی ئەو گازەیە بۆ پاڵپشتی بازاڕە ناوخۆییەكانی میسر و شلكردنەوەی گاز لە وێستگەكان میسر و پاشان رەوانەكردنی بۆ بازاڕەكانی جیهان.

گواستنەوەی گازی قوبرسی بۆ میسر

سەرۆكی میسر سەرۆك وەزیران و وەزیری نەوت و سامانی ژێر زەوی وڵاتەكەی راسپاردووە هەماهەنگی بۆ گواستنەوەی گازی قوبرس بكەن، ئەوەش بۆ بەهێزكردنی سوودوەرگرتن لەو یەدەگە زۆرە.

جۆرج باباناستاسیۆ، وەزیری وزەی قوبرسی یۆنانی رایگەیاند، گازی قوڕبسی ئامادە دەكرێت بۆ چوونە بازاڕەكانی ئەوروپا ئەوەش لە دەروازەی میسرەوە دەبێت، كە خاوەنی ژێرخانێكی بەهێزە و هێڵەكانی ژێر دەریای ناوەندە، كە دەتوانێت گاز بۆ ئەوروپا بگوازێتەوە، لە پاڵ ئەوەشدا خاوەنی وێستگەی شلكردنەوەی گازی سرووشتیە.

وەزیری وزەی قوبرسی روونی كردۆتەوە، كە وڵاتەكەی گفتوگۆكانی بۆ رەونەكردنی گاز بۆ میسر دەست پێكردووە، ئەوەش تەواوكەری لێدوانەكانی پێشووی بەرپرسێكی میسرییە لە وەزارەتی نەوت و سامانی ژێر زەوی ئەو وڵاتە، كە گوتووبووی، كۆمپانیا جیهانییەكانی بواری دۆزینەوەی گاز لە قوبرس ئامادەسازی دەكەن بۆ بەستنەوەی بەرهەمی كێڵەگانی گازی ئەو وڵاتە بە كێڵگە دەریاییەكانی میسر بۆ گواستنەوەیان بۆ وێستگەكانی شلكردنەوە لە قاهیرە.

بەگوێرەی سەكۆی بە وزە، قوبرس توانیویەتی بگات بە دۆزیینەوەی گازێكی زۆری سرووشتی كە بڕەكەی دەگاتە نزیكەی (15) تریلیۆن پێ چوارگۆشە، لەوانەش كێڵگەی ئەفرۆدیت كە قەبارەی یەدەگی دەگاتە تریلیۆن (600) ملیار پێ چوارگۆشە.

هەماهەنگی نێوان میسر و سعوودیە 

لە پاڵ گفتوگۆكانی گواستنەوەی گازی قوبرسی بۆ میسر، كۆبوونەوەكانی هەنگاونان بەرەو هەماهەنگی سعوود و میسر لە بواری وزە بەردەوامە، ئەوەش لە چوارچێوەی بەدواداچوون بۆ جێبەجێكردنی یاداشتی واژۆكراوی لێتێگەیشتن كە لە پەراوێزی كۆنفراسی (ئیجبس 2025) لە قاهیرە لە مانگی شوباتی ئەم ئەمساڵ بەڕێوەچووە. 

محەمەد شەناوی، گوتەبێژی سەرۆكایەتی میسر دەڵێت، "كۆبوونەوەی سەرۆكی میسر و ئەنجوومەنی وەزیران بە هەمان شێوە چالاكییەكانی گەڕان و دۆزیینەوەی نوێی تایبەت بە میسر لە كێڵگەی نەوتی گاز "فیوم 5" لە ناوچەی كینج مەریوت ئامانج لێی بەهێزكردنی یەدەگی نەوت و گازی میسرە."

لە بەشێكی دیكەی قسەكانی شەناوی ئاماژە بەوە دەكات، لە پاڵ ئەوەشدا ئاماژەدان بە چالاكییەكان وەزیری نەوتی میسر ژمارەیەك رێككەوتنی نوێی خستەڕوو كە كاریگەری لەسەر زیادبوونی هەوڵەكانی دۆزینەوە و گەڕان بەدوای نەوت و گاز دەبێت، سەرۆكی میسر جەختی لەسەر ئەوە كردەوە، هەموو هەوڵێك بدەن بۆ ئەوەی كارەكان بە شێوەی فراوانتر لە بواری دۆزینەوەی نوێ بچێتەپێش، بەتایبەت دەوڵەت دەبێت هەموو پاڵنەرێكی پێویست بۆ خێراكردنی گەشەی كێڵگەكان و چڕكردنەوەی كردەی بەرهەمێنان دابین بكات.

گوتەبێژی سەرۆكایەتی روونی دەكاتەوە، وەزیری نەوتی میسر ژمارەیەك ئامادەكاری و دۆخی رێژەی هەڵگیراوی ستراتیژی بەرهەمە نەوتییەكان بۆ پێشوازی لە مانگی هاوین خستۆتەڕوو، ئەوەش بۆ دابینكردنی پێداویستی هاونیشتیمانیانە، ئاماژە بەوەش دەكات، زیادبوونی ناوخۆیی لە میانەی ماوەی داهاتوو كاریگەری لەسەر یەدەگ و هەڵگیراوی ستراتیژی دەبێت.

شەناوی جەخت لەسەر ئەوە دەكاتەوە، سەرۆكی میسری لایەنی پەیوەندیداری ئاراستەكردووە بۆ دابینكردی  پێداویستی و پێدانی شایستەی كۆمپانیاكانی گاز و نەوت لە میسر ، پابەندبوون بەو پابەندییانەی دەكەوێتەسەریان، دەبێتە هۆی زیادبوونی بەرهەمی ناوخۆیی و دابینكردنی پاڵنەرەكان بۆ خێراكردن و چڕكردنەوەی چالاكیی گەشەی كێڵگەكان و بەرهەمهێنان و دۆزینەوەی نوێ.

سەرچاوە: ماڵپەڕی تاقە