Nuce Logo

ئەمڕۆ یەکشەممە (22/ئایار/2022) سەرۆکى هەرێمى کوردستان، لەمیناى بەشداریکردنى لە رێوڕەسمی دەرچوونی خولی (6)ی ئەفسەران و خولی (16)ی پێشمەرگە لە کۆلێژی سەربازیی (3)ی قەڵاچوالان، وتارێکى پێشکەشکرد.

سەرۆک نێچیرڤان بارزانى لە بەشێکى وتارەکەیدا گووتى، "بەهۆی ناکۆکییە سیاسییەکانەوە لە هەرێمی کوردستان زۆرجار هەست بە نائومێدی و رەشبینیی خەڵکی کوردستان دەکەم، ئەمە زۆر ئازاربەخشە، بەڵام من خۆم هەمیشە گەشبینم، چونکە زۆر باوەڕم بە هۆشیاریی گەلی کوردستانە، شوکر هۆشیارە خەڵکی کوردستان" 

سەبارەت ناکۆکییە سیاسییەکانى ناوخۆى هەرێمى کوردستان سەرۆکى هەرێمى کوردستان، جەختى لەوەکردەوە "پێویستە حکومەت، پەرلەمان، دەسەڵاتی دادوەری و سەرۆکایەتیی هەرێمی کوردستان نەکرێنە گۆڕەپانی ململانێی حیزبی، دەبێت هەمیشە دووربن لەو ململانێیە. داهاتی هەموو هەرێمی کوردستان بۆ هەموو فەرمانبەران و هەموو خەڵکی هەرێمی کوردستانە."

دەقی وتارى سەرۆک نێچیرڤان بارزانی، سەرۆکی هەرێمی کوردستان:

 ئامادەبووانی بەڕێز، پێشمەرگە قارەمانەکان. بەڕێزان، فەرماندە و مامۆستا و راهێنەرانی سەربازی، کەسوکاری ئازیزی دەرچووان؛ هەروەها بەخێرهاتنی برای بەڕێز و خۆشەویستم کاکە بافڵ دەکەم، سەرۆکی یەکێتیی نیشتمانیی کوردستان.

 رۆژتان باش و هەموو لایەکتان بەخێربێن

خۆشحاڵم ئەمڕۆ لە رێوڕەسمی دەرچوونی خۆشەویستترین کەسانی کوردستان کە ئەوانیش پێشمەرگە قارەمانەکانن، بەشدار دەبم. سەرەتا دەمەوێت دەستخۆشی لە هەموو مامۆستا و راهێنەرانی سەربازیی هەردوو خوولی شانزەهەمی بنەڕەتی و 6ی پێگەیاندنی ئەفسەران بکەم. ئێوە ماوەی دوو ساڵ و سێ مانگ لەگەڵ خوولی بنەڕەتی 9 مانگیش لەگەڵ خوولی پێگەیاندنی ئەفسەران ئەرکتان کێشا، کارەکانتان شایەنی دەستخۆشی و پێزانینێکی زۆرە.

دەستخۆشی لە راگر و کارمەندانی کۆلێژی سەربازیی 3 لە قەڵاچوالان دەکەم کە لەو ماوەیەدا زۆر ئەرکیان کێشا بۆ دابینکردنی هەموو پێداویستییەکانی سەرکەوتنی ئەم دوو خوولە.

رۆڵی کۆلێژی سەربازیی 3 لە پێگەیاندنی پێشمەرگە و هێزی سەربازیی عێراقدا رۆڵێکی دیار و جێگەی رێز و دەستخۆشییە. هەر لێرەدا پێوستە بڵێم کۆلێژی سەربازیی قەڵاچوالان یادگارییەکی گرنگی سەرۆک مام جەلالە، گیانی شاد و یادی هەمیشە بەخێر.

پیرۆزبایی لە یەک بە یەکی ئەو 503 ئەفسەر و دەرچووە دەکەم کە لە هەموو پارێزگا و ناوچەکانی هەرێمی کوردستان و ناوچە ناکۆکی لەسەرەکان تێیدا بەشداربوون، پیرۆزباییەکی تایبەتیم ئاراستەی ئەو کچانە دەکەم کە لەو خوولەدا بەشدارن، هەوڵ دەدەن و سوێندیان خواردووە کە لەگەڵ کوڕەکانی ئەو وڵاتە هەمیشە ئامادەبن بۆ بەرگری لە خاک و دەستکەوتەکانی، پیرۆزبایی تایبەتیان لێدەکەم و هیوادارم نموونەیان لە کوردستان زۆر بێت.

دڵنیام هەمووتان لەڕووی تیۆری و پراکتیکییەوە زۆر فێربوون و دەتوانن خوێن و هێزێکی تازە بخەنە ناو هێزی پێشمەرگەوە، پیرۆزبایی لە دایک و باوک و کەسوکاری دەرچووان دەکەم، سوپاسیان دەکەین کە رۆڵەکانیان پێشکێش بە هێزی پێشمەرگەی کوردستان کردووە، دەستخۆشی لە هاوکاریی وەزارەتی پێشمەرگە و وەزارەتی بەرگریی حکومەتی فیدراڵیی عێراق دەکەین بۆ هاوکاریی بەردەوامیان لەگەڵ کۆلێژی سەربازی.

خەڵکی کوردستان و عێراق، پیرۆزبایی لە ئێوە دەکەم کە ئەمڕۆ لێرەدا دەرچوونی ئەو پۆلە پێشمەرگەیە دەبینن، چونکە ئەمانە دەبنە یارمەتیدەرێکی سەرەکی بۆ پاراستنی سەروەریی عێراق، پاراستنی سەروەریی عێراق لە بەرژەوەندی هەموو هاووڵاتییەک و ناوچەیەکی عێراقە. پاراستنی عێراق زۆر بەلای ئێمەوە گرنگە، بە هەمان شێوەش پێویستە پاراستنی هەرێمی کوردستانیش وەکو بەشێک لە دەوڵەتی عێراق بەلای هەموو عێراقییەک و هەموو دامەزراوە دەوڵەتییەکانی عێراقەوە جێگەی بایەخ بێت و وەکو ئەرکێکی هاوبەش تەماشا بکرێت.

بەهێزبوونی عێراق و پارێزراوبوونی بەرژەوەندییەکانی گەلی عێراق دەبێتە مایەت بەهێزبوونی هەموو ناوچەکانی عێراق، لەوانەش هەرێمی کوردستان.

فیدراڵییش بۆ ئاسانکردنی بەڕێوەبردنی کاروبارە نێوخۆییەکانی وڵات و یەکسانیی نێوان پێکهاتەکان و ناوچەکانی عێراقە. فیدراڵی سەروەریی عێراق لاواز ناکات، بەڵکو هاوبەشیمان لە وڵاتی عێراقدا بەهێز دەکات.

دەستووری عێراقیش کاتی خۆی بەو هەست و تێگەیشتنە نووسراوەتەوە، لەبەر ئەوەش ئێمە هەمیشە داوا دەکەین بەپێی دەق و روحی ناو دەستوور هەڵسوکەوت لەگەڵ یەکتردا بکەین، کە ئێمە پێمانوایە ئەگەر بەو شێوەیە بێت، هەموومان براوەی پرۆسەی سیاسیین لە عێراقدا.

ئەوکاتەی سنوورەکان، دەسەڵاتەکان و بڕیارەکانی عێراق لە دەستوەردانی دەرەکی پارێزراو دەبن، ئەمە لە بەرژەوەندیی تەواوی عێراقە. ئەوکاتەی هەموو هەرێم و پارێزگا و ناوچەکانی عێراق پارێزراو دەبن، ئەمە لە بەرژەوەندیی هەموو عێراقییەکە. ئەمە تێڕوانینی ئێمەیە لە هەرێمی کوردستان، پێشمەرگەش بەو هەست و باوەڕەوە پەروەردە دەکرێت. هەر لەبەر ئەوەشە بە شانازییەوە دەڵێین، دوای رووخانی رژێم لە ساڵی 2003، ئاسایشی چەند جێگەیەکی بەغدا و پەرلەمانی عێراق بە پارێزراوی مانەوە، چونکە پاراستنیان ئەرکی پێشمەرگەی کوردستان بوو. بە شایەتیی هەموو لایەک پێشمەرگە بەشێوەیەکی زۆر پیشەیی ئەرکی خۆی بەڕێوەبرد و ئێستاش لە هەندێک لەو شوێنانە بەڕێوەدەبات.

هەروەها لە شەڕی داعشدا پێشمەرگە هاوبەش و پشتیوانییەکی بەهێزی سوپا و هەموو هێزە چەکدارەکانی عێراق بوو، لە پاراستنی پارێزگای کەرکووک و دیالە، لە رزگارکردنی بەشیر و موسڵ و زۆر شوێنی دیکە لە عێراقدا.

بۆیە لێرەوە داوا لە هەموو عێراقییەک دەکەم دژی ئەو هێرشانە بێت کە گرووپە یاسا شکێنەکان لە ناوخۆی عێراقەوە دەیکەنە سەر هەرێمی کوردستان و هەولێری پایتەخت. ئەم گرووپانە بەم کارانەیان رێگە خۆش دەکەن بۆ بەردەوامبوونی ئاڵۆزی و پشێوی لە عێراق، ئەمانە دەیانەوێت زەمینەی پێشێلکردنی سەروەریی عێراق بەردەوام بێت، ئارامیی هەموو شار و شوێنەکانی هەرێمی کوردستان و عێراق بە گشتی، ئارامیی هەولێر و نەجەف، سلێمانی و بەسرە، دهۆک و ئەنبار [هەموویان] یەکن و هەمووی پێکەوە بەستراونەتەوە. سەروەریی هەموومان هاوبەشە لە عێراقدا، بە هەمان شێوە بەرژەوەندییەکان و سەرکەوتن و شکستەکانیشمان هاوبەشن.

هەروەها دەمەوێت لەو رێوڕەسمەدا داوا لە بەڕێزان فەرماندەی گشتیی هێزە چەکدارەکانی عێراق، وەزیری بەرگری و سەرۆکی ئەرکانی سوپای عێراق بکەم کە هەروەک لە دەستووری عێراقدا هاتووە، وەکو بەشێک لە سیستمی بەرگریی عێراق تەماشای هێزی پێشمەرگە بکەن و پێداویستییەکانی پێشمەرگە دابین بکەن.

هەروەها زۆر پێویستە پەلە بکرێت لە دەستبەکاربوونی هەردوو لیوای هاوبەش کە بڕیاری لێدراوە بۆئەوەی رێگە لە بەهێزبوونی داعش لە ناوچە ناکۆکی لەسەرەکان بگرێت.

بە داخەوە رۆژانە دانیشتووانی گوند و ناوچەکانی سنووری ماددەی 140ی دەستوور، پێشمەرگە و سوپا و حەشدی شەعبی لەو ناوچانە دەکەونە بەر پەلاماری تیرۆریستانی داعش. لەبەر زۆربوونی هێرش و کردەوەکانی داعش لەو ناوچانە، ئاساییکردنەوەی دۆخی شنگال و کەرکووک و مەخموور و خانەقین و گوڵاڵە و ناوچەکانی دیکە لە هەموو کاتێک زیاتر پێویستە بۆ سەقامگیری لە عێراق و کوردستان.

دەبێت هەموومان هاوکاربین تاوەکو رێگە لە بەهێزبوونەوەی داعش بگرین، رێگە نەدەین ئەو هاوکارییە تێکبچێت کە لە شەڕی داعش لەنێوان هەموو پێکهاتەکانی عێراقدا هاتە ئاراوە.

ئەو ئۆپەراسیۆنە هاوبەشانەی ئەو دواییەی نێوان پێشمەرگە و سوپای عێراق دژی داعش کران، کارێکی زۆر سەرکەوتووانە بوون، بەڵام ئەمە بەس نییە و پێویستی بە کاری هاوبەش و بەردەوامە. دەستبەکاربوونی هەردوو لیوای هاوبەشی پێشمەرگە و سوپا لەو بوارەدا هەنگاوێکی باش دەبێت.

خەڵکی خۆشەویستی کوردستان

تاوەکو ئێستا هەردوو هێزی پشتیوانیی یەک و دوو، هەروەها 22ی لیوای هێزەکانی 70 و 80 خراونەتە سەر وەزارەتی پێشمەرگە، ئەمە هەنگاوێکی گرنگە و جێگەی رێز و دەستخۆشییە بۆ پارتی دیموکراتی کوردستان و یەکێتیی نیشتمانیی کوردستان و هاوپەیمانان، بەڵام رێکخستنەوە و یەکخستنی پێشمەرگە پێویستی بە کار و هەنگاوی خێرا و بە متمانەیە.

پێشمەرگە لە کاتی شەڕی داعشدا قارەمانییەکی ئەوتۆی نواند کە بووە جێگەی دەستخۆشیی گەلان و گەورە سەرۆکەکانی جیهان، وەکو هەمیشە بووە مایەی شانازیی گەلی کوردستان. بۆ پاراستنی شانازی و رێز و خۆشەویستیی پێشمەرگە دەبێت یەکبخرێتەوە. 

راستە بەپێی یاسا، سەرۆکایەتیی هەرێمی کوردستان ئەرکی فەرماندەی گشتیی هێزەکانی پێشمەرگەی لەسەر شانە، بەڵام بۆ ئەوەی چاکسازی و یەکخستنی پێشمەرگە جێبەجێ بکرێت، دەبێت پارتی و یەکێتی بە باوەڕ و بەبێ پەشیمانبوونەوە بڕیار بدەن، کە دەستی حیزب لەسەر پێشمەرگە هەڵبگرن. دەبێت کۆتایی بە دەستوەردانی حیزبی لەناو کاروباری پێشمەرگەدا بهێنن، بەو شێوەیە چاکسازی و یەکخستنی راستەقینەی پێشمەرگە دەستپێدەکات و سەردەکەوێت، ئەگەرنا لەگەڵ هەموو ناکۆکییە سیاسییەکاندا ئەوەی جێبەجێش کراوە هەڵدەوەشێتەوە.

یەکنەخستنی پێشمەرگەو هێز و دامەزراوە ئەمنییەکان وایکردووە هەموو ناکۆکییە سیاسییەکان لە هەرێمی کوردستان راستەوخۆ کار لەسەر ئاسایش و دەروونی هاووڵاتیان و بازاڕ و بازرگانی و کەسابەتی خەڵکی ئەم وڵاتە بکات. وایکردوو خەڵک چاوەڕوانی لەتبوونی هەرێمی کوردستان و تەنانەت شەڕیش بکەن، کە بە خۆشحاڵییەوە لە کاتی ناکۆکییە هەرە سەختەکانیشدا من هەمیشە ئەوەم زۆر بە دوور بینیوە، بەڵام نیگەرانی و مەترسی و هەستیاریی خەڵکی کوردستان دەبێت بۆ ئێمە جێگەی بایەخ بێت. دەبێت هاندەرمان بێت بۆ بەجێهێنانی ئەو بەڵێنەی حیزبەکانمان بە گەلی کوردستانیان داوە، بۆ سوێندی هەریەک لە ئێمە بەرامبەر بە گەلی کوردستان و رۆحی شەهیدانمان کە بەڵێنمان داوە پێشمەرگە بکەینە هێزێکی نیشتمانی دوور لە کارپێکردن و دەستوەردانی حیزبی، رێگە بگرین لە لەتبوونی خاک و گەل و بەرژەوەندییەکانی گەلەکەمان.

ئەگەر بمانەوێت رێز لە رۆحی شەهیدان بگرین، ئەگەر بمانەوێت رێز لە خەباتی پێشمەرگە و فیداکاری و قارەمانیێتیی ئەو پێشمەرگانە بگرین کە لەپێناو پاراستنی کوردستان و دەستکەوتەکانیان سەریان دانا و خوێنیان رشت، ئەگەر بمانەوێت خۆشەویستیی پێشمەرگە لە دڵی خەڵکی کوردستاندا بهێڵینەوە و قارەمانێتیی پێشمەرگە لەبەرچاوی جیهان نەشکێنین، دەبێت دەستوەردانی حیزبی لە کاروباری پێشمەرگەدا بە زووترین کات کۆتایی پێ بهێنین.

زۆر ئامانجی رەوا و پیرۆز و گەورە هەن کە حیزبەکان لە کوردستان و عێراق دەتوانن پێیەوە سەرقاڵ ببن و کاری بۆ بکەن و دەستکەوتەکانی هەرێمی کوردستان بەرەو پێشەوە ببەن.

نابێت حیزبەکان لە کشانەوەی دەستی خۆیان لەناو هێزی پێشمەرگەدا بە گومان بن، چونکە حکومەت و سەرۆکایەتیی هەرێمی کوردستان دوو دەزگای نیشتمانیی جێگەی متمانەی خەڵک و حیزبەکانی کوردستانن، پەرلەمانی کوردستانیش وەکو دەزگای هەرە باڵای چاودێری بەسەر هێزی پێشمەرگەوە چاودێر دەبێت.

ئامادەبووانی خۆشەویست..

بۆچی پێویستە پەلە بکەین لە رێکخستنەوە و یەکخستنی دامەزراندنی پێشمەرگە؟ شەڕی گەورە و فراوانی ئێمە لەگەڵ داعش وایکرد باشترین راوێژکارە سەربازییەکانی وڵاتان هاوکاریی سوپای عێراق و هێزی پێشمەرگە بکەن، ئەو هاوکارییانە ئێستاش بەردەوامن، جێگەی رێز و سوپاس و پێزانینی گەلی کوردستان و حکومەتی کوردستان و سەرۆکایەتیی هەرێمی کوردستانە.

هاوپەیمانان پرۆژەیەکی زۆر باشیان دەستپێکردووە بۆ بەخشینی راوێژ و هاوکاری بە پێشمەرگە بۆ رێکخستنەوە و یەکخستنی بە بەرنامەی پێشمەرگە، ئەمە دەرفەتێک دەبێت تاوەکو حیزبەکان ئەم دەرفەتە لەدەست پێشمەرگە و گەلی کوردستان نەدەن. هاوپەیمانان هاوکاریی پێشمەرگە دەکەن، بەڵام خۆیان ناخەنە ناو کێشە و ململانێی نێوان پارتی و یەکێتی لەناو هێزی پێشمەرگەدا.

داوا لە حکومەتی عێراقی فیدراڵیش دەکەم کە زۆر بە جیددی پشتیوانی لەو پرۆسەیە بکات، چونکە ئەوە دەستکەوتێکی نیشتمانیی عێراقییە و پێشمەرگە بە شانازییەوە بەشێکە لە سیستمی بەرگریی عێراق.

لە شەڕی داعشدا پێشمەرگە بە خوێنی خۆی سەلماندی کە پارێزەری هەموو خەڵکی عێراقە و بۆ سوپای عێراقیش پشتیوانە. هەروەها دەبێت بە جیددی دەستبکەین بە بەشداریپێکردنی هەموو پێکهاتەکانی کوردستان لەناو هێزی پێشمەرگەدا، زۆر پێویستە تورکمان، ئاشووری، کلدان سریانی، ئێزدی و هەموو پێکهاتەکان بە رێژەیەکی بەرچاو بەشداربن لەناو هێزی پێشمەرگەدا. ئەمەش نامۆ نییە بە مێژووی پێشمەرگە و خوێنی سەدان پێشمەرگەی عەرەب، مەسیحی، ئێزدی و تورکمان لەناو داستانەکانی پێشمەرگەدا کە بە خوێنی خۆیان نووسیویانە.

 هاووڵاتییانی خۆشەویست..

بۆ کەمکردنەوەی ناکۆکییە سیاسییەکان و کاریگەرییەکانی بەسەر بارودۆخی کوردستانەوە، ئێمە وەکو ئەرکی یاسایی خۆمان لە سەرۆکایەتیی هەرێمی کوردستان بۆ چارەسەر هەوڵمانداوە و هەوڵدەدەین، بەردەوام لەگەڵ هەموو لایەنەکان گفتوگۆمان کردووە و دەیکەین. بە خۆشحاڵییەوە دەڵێم، ئێستا زەمینەیەک هاتووەتە پێشەوە بۆ نەرمی نواندن و گفتوگۆ لەگەڵ یەکدی، شەڕی راگەیاندنیش هەندێک کەمبووەتەوە. لەڕاستیدا ئێمە ناکۆکیی زۆر گەورەی ئەوتۆمان نییە کە چارەسەر نەکرێن، بەڵام هەندێکجار بەربەستی دەروونی بۆ دانیشتن لەگەڵ یەکدی دروستدەکەین، ئەم دۆخە زۆرجار لەناو یەکێتی و پارتیدا دروستدەبێت کە بەڕاستی جێی ناڕەحەتیی هەموو گەلی کوردستانە. لە رابردوودا هەر وامانکردووە، ئێستاش هەر دەبێت وا بکەین کە پێویستە حکومەت، پەرلەمان، دەسەڵاتی دادوەری و سەرۆکایەتیی هەرێمی کوردستان نەکرێنە گۆڕەپانی ململانێی حیزبی، دەبێت هەمیشە دووربن لەو ململانێیە. داهاتی هەموو هەرێمی کوردستان بۆ هەموو فەرمانبەران و هەموو خەڵکی هەرێمی کوردستانە، لە هەمان کاتدا دەبێت بڕیارەکانی حکومەت و هەموو دامەزراوەکانی هەرێمی کوردستان بە لەیەکدی تێگەیشتن لە هەموو ناوچەکان وەکو یەک جێبەجێ بکرێن.

بەداخەوە بەهۆی ناکۆکییە سیاسییەکانەوە لە هەرێمی کوردستان زۆرجار هەست بە نائومێدی و رەشبینیی خەڵکی کوردستان دەکەم، ئەمە زۆر ئازاربەخشە، بەڵام من خۆم هەمیشە گەشبینم، چونکە زۆر باوەڕم بە هۆشیاریی گەلی کوردستانە، شوکر هۆشیارە خەڵکی کوردستان.

ئەم دڵتەنگییەی خەڵکیش لە ناکۆکیی نێوان حیزبەکان نیشانەی دیاری هۆشیاریی خەڵکی کوردستانە، زۆرجار گوێم لە ئەفسەر و پلەدارانی پێشمەرگە دەبێت کە زۆر نیشتمانییانە کێشەکان و تەنانەت چارەسەرەکانیش دەخەنەڕوو، لەبەرئەوە باوەڕم زیاتر دەبێت کە پێشمەرگە دەتوانێت بەردەوام جێگەی خۆشەویستیی گەلی کوردستان و جیهان بێت، ئەگەر بە باشی رێکبخرێت و یەکبخرێت و بە تەواوەتی دەبێت خۆی بەدووربخات لە ململانێی سیاسی لەناو هەرێمی کوردستاندا. ئەرکی پێشمەرگە پاراستنی دەستکەوتەکانی هەرێمی کوردستانە کە بە خوێنی سەدان و هەزاران شەهید بەدەستهاتوون، پێشمەرگە دەبێت وەفاداری ئەو سوێندە بێت کە خواردوویەتی، دووربێت لە ململانێی سیاسی لەناو هەرێمی کوردستان و لەنێوانی حیزبەکاندا.

هۆکاری ئەوەش کە ئێستا زۆر دڵخۆشم بە دەرچوونی ئەو دوو خوولەی پێشمەرگە ئەوەیە کە دەزانم ئەمانە بە روحێکی نیشتمانییانە و بەپێی زانستی پێشکەوتووی سەربازی راهێندراون.

دیسانەوە دەمەوێت پیرۆزبایی لە هەمووتان بکەم، هەربژین و هیوای رۆژێکی خۆش بۆ هەمووتان دەخوازم، بژی کوردستان، بژی کورد، ئاوەدان بێت وڵات و ئێوەش سەرکەوتووبن ئیشەڵڵا. زۆر سوپاس.