Nuce Logo

د،زوبێر رەسوڵ، سەبارەت بە هۆکاری ناسەقامگیری دۆخی سیاسی لە عیراق دەڵێت"دۆخی سیاسی ئێستا دۆخێکی نا سەقامگیرە، دوای ئەو هەموو ساڵەی بنیاتنانەوەی عێراق، لە پێکهێنانی حکومەتدا کێشە دروست دەبێت، واتا ئێمە تا ئێستا نەگەشتووین بەوەی کە پڕۆسەی دەستاو دەستکردنی دەسەڵات بە ئاشتیانە لە عێراق هەبێت، ئەوە قۆناغێکی زۆر گرنگە هەم بۆ هەرێم و هەم بۆ عێراقیش، لەبەر ئەوەی هەر لایەنێکی سیاسی ئەگەر براوەش بێت لایەنەکانی دیکە رێگای پێنادەن حکومەت پێکبهێنرێت و هەڕەشەی لێدەکەن، بۆیە ئەگەر بەم دۆخە حکومەت دروست بکرێت رەنگە دووساڵ تەواونەکات".

وێڕای ناکۆکییە سیاسییەکان لەسەر ئاستی ناوخۆی عێراق، دەستوەردان و گوشاری هەرێمی هەیە. ئایا لە بەرژەوەندی کام جەمسەر دەشکێتەوە؟ د.زوبێر رایوایە"گوشاری هەرێمی لەسەر کورد و لایەنە سیاسییەکانی عێراقیش هەیە، دەبێت بە هەر جۆرێک بێت حکومەت پێکبێت لەگەڵ ئەو لایەنانەی لە چوارچێوەی هەماهەنگیدان و بەشدارییان پێبکرێت، ئەوەش واتای مانەوەی میلیشیاکان و ئەو هێزانەی کە لە دەرەوەی یاسان و لە ئێرانییەکان نزیکن".

ئەگەر دەستوەردانە هەرێمییەکان بەمجۆرە بن، پرسیار لەسەر شەرعیەتی پرۆسەی سیاسی لە عیراق دەمێنێت، ئایا عیراق دەتوانێ خۆی لەم هەژمونە رزگاربکات د.زوبێر گوتی "هۆکار زۆرن، یەک لەوانە هەتا ئێستا دوای بیست ساڵ هێشتا دامەزراوە سیاسییەکانی عێراق نەگەشتوونەتە ئەو ئاستەی بتوانن خۆیان بەڕێوە ببەن، دامەزراوەکان بەهێزن نین لەراستیدا کەسایەتییەکان بەهێزترن، دواتریش خەڵکێکی زۆر کەم بەشداری هەڵبژاردنەکانی کرد ئەوەش پرسیار دروست دەکات لەسەر شەرعییەتی پڕۆسەی سیاسی، دامەزراوەکان بەهێزنین و تا ئێستا کەسەکان پڕۆسەی سیاسی بەڕیوە دەبەن، هۆکارێکی دیکە ئەو دەستوەردانە هەرێمییەیە کە باسمان کرد، ئەگەر دەستوەردانی هەرێمی نەبوایە ئێستا حکومەت پێکدەهێنرا و لایەنەکان نەیاندەتوانی هەڕەشەبکەن ، بەڵام دیارە لایەنی هەرێمی گوشاری زۆرە کە حکومەتەکە حکومەتی لایەنە براوەکان نەبێت، بۆ نمونە ئەو هاوپەیمانییە سێ قۆڵییە هەیە لەنیوان (حەلبووسی، پارتی، سەدر)دا، ئەگەر بە پێوەری دیموکراتی بێت ئەوە ئێستا حکومەت پێکدەهات، ئۆپۆزسیۆنیش دەبوو".

خاڵێکی دیکەی جێگەی باس لای د.زوبێر ئەوەیە کە لەم پرۆسە سیاسییەدا لایەنەکان نایانەوێ لە دەرەوەی دەسەڵات بمێننەوە چونکە" لایەنە سیاسییەکان دەزانن ئەوەی لە دەسەڵات نەبیت ئاسان نییە بمێنێتەوە، ئەگەر لە ناو حکومەت بن دەتوانن گەندەڵی زۆر بکەن بۆ بەهێزکردنی پێگەی خۆیان بەکار ی بهێنن. بۆ نمونە ( مالیکی، عەبادی، عادل عەبدول مەهدی، هەتا کازمیش) هیچ نەبوون،کەسیش ئەمانەی نە دەناسی کە پێشتر لەناو حکومەت نەبوون، کە ئێستاکە هاتوونەتە ناو حکومەت بوون بە هەمووشت، ئەو لایەنانەی لە دەرەوەی حکومەتن دەترسێن ئەگەر لەناو حکومەت نەبن هیچیان بۆ نەمێنێتەوەو پێگەشیان دابەزێت، پێشتر مالیکی کە لەناو حکومەت بوو 90 کورسی هێنا، ئێستا 17)یا (18کورسی هەیە بەبێ بوونی هاوپەیمانی".

دەربارەی لێکەوتەکانی بەردەامبوونی ئەو رەوشەی ئێستای عیراق د.زوبێر پێیوایە بۆ عیراق و هەرێمی کوردستانیش باش نییە "لێکەوتەی خراپی دەبێت لەسەر  پرۆسەی سیاسی لە عیراق و هەرێمی کوردستانیش، چونکە کێشەکە هەر لەوێ نییە ئێستا هاتووەتە هەرێمی کوردستانیش، لەنێوان (پارتی و یەکێتی) هەتا رەنگدانەوەی دەبیت لەسەر هەڵبژاردن و حکومەتی ئایندەی هەرێمی کوردستان ئەگەر بەوجۆرە بەردەوام بێت، ئەگەر ئەو دەستپێشخەرییانەی دەکرێت بەتایبەت دەستپێشخەرییەکەی بارزانی و ئەوانی دیش هێشتا بوار ماوە لەبەغدا، راستە نێوانیان پارتی و یەکێتی بەوجۆرەیە دەتوانم بڵێم خراپتریشە بۆسەر ئایندەی هەرێمی کوردستان، بەتایبەت دوای ئەو گۆڕانکارییانەی یەکێتی کردی لەناو حزبەکەی رەنگبێت کاریگەری لەسەر دروست بکات، دەستاودەستکردنی دەسەڵات بە دڵنیاییەوە لە هەرێمی کوردستانیش کێشەی هەیە، لەوانەیە پارتی و یەکێتی ئەگەر دەنگیش نەهێنن ئامادە نەبن وا بە ئاسانی دەسەڵات ئاڵوگۆڕ بکەن".