Nuce Logo

ئەگەرچی دەستووری فیدڕاڵی عێراق چەند جارێک و لە چەندین ماددەی جیاواز جەختی لەسەر ئاسایش، سەقامگیریی و سەروەریی خاکی عێراق و هەرێمی کوردستان کردۆتەوە، هەروەها میکانیزمی پاراستن و هەنگاوەکانی ڕووبەڕوو بوونەوەی بەزاندنییانی چەسپاندووە، بەڵام لە کاتە جیاوازەکان و لەژێر دۆزینەوەی بیانووی جیاواز بۆ ئەنجامدانی کاری دژ بە پاراستنی سەروەری، تێکدانى سەقامیگیریی عێراق و هەرێمی کوردستان لەلایەن میلیشیاکانەوە، ئەنجامدانی ئەو کارانە بە ڕێگای جیا جیا و لە کاتێکەوە بۆ کاتێکی تر بەردەوامە.

ئامانجەکانی هێرشە درۆنییەکان

هێڕش و پەلاماری میلیشیاکان بۆ سەر عێراق و هەرێمی کوردستان پێشهاتی نوێ نین و مێژووییان هەیە، ئەگەر تەنیا چەند ساڵانێکی کەم پێش ئێستا وەربگرین دەبینین "لە ناوەڕاستی (2019) تاکو ئاداری (2023) میلیشیا ئێرانییەکان بەشدار بوونە لە زیاتر لە (100) ئۆپراسیۆنی گەورەی جۆراوجۆری دژ بە هێزەکانی ئەمەریکا، و بنکە سەربازییەکانیان کە تووندوتیژی، فڕۆکەی بێ فڕۆکەوان، و چەکی ئێرانی تیادا بەکار هاتووە. میلیشیاکان ئەمەریکا وەک هێزێکی داگیرکەر دەبینن کە دەستێوەردان لە کاروباری ناوخۆی عێراقدا دەکەن و سەروەریی بەغدا لاواز دەکەن، گرووپە میلیشیاییەکان ئۆپراسیۆنەکانیان بەشێوەیەکی فراوان دەستپێکرد لە ڕابردوودا و ئامانجی ستراتیژییە گرنگەکانی میلیشیا جیاوازەکان بنکە و کاروانە لۆجیستییەکانی ئەمەریکایە وەک وەڵامدانەوەی لە بەرانبەر سێ فاکتەری سەرەکی کە بریتیین لە، گرژییەکانی نێوان ئەمەریکا و ئێران، ململانێی نێوان میلیشیاکان، و پێشهات و گۆڕانکارییە سیاسییە ناوخۆییەکان".[1] زۆربەی جار هەر زوو پاش ئەنجامدانی هێرش و پەلامارەکان گرووپێک لە گرووپە میلیشیاییە جیاوازەکان بەرپرسیارییەتی خۆی لە هێرشەکەدا دەگرتە ئەستۆ.

ئاشکرایە "لە دوای سەرهەڵدانی دەوڵەتی ئیسلامی بەناو داعش لە عێراق و سووریا دەرکەوتن و پەلامارەکانی میلیشیا ئێرانییەکان زیاتر بوون،"[2] بەڵام لە دوای شەڕی غەزە و ئیسرائیلەوە هێڕشەکانییان چڕتر و زیاتر کردووەتەوە، بە شێوەیەکی فراوان دەستییان بە ئەنجامدانی هێڕشە جیاوازەکانییان کردووە، وەک خۆیان ئاماژەی پێدەکەن، ئامانجی هێرشەکانییان سەربازانی وڵاتانی هاوپەیمانی نێودەوڵەتی و بەدیاریکراویش سەربازانی ئەمەریکایە لە بەرانبەر هەڵوێستی ئەمەریکا لە شەڕی فەڵەستین و ئیسرائیل، بێدەنگبوونی کۆمەڵگەی نێودەوڵەتی لەبەردەوامی ئەو شەڕەدا. 

لە "(17)ـی ئۆکتۆبەرى ساڵى ڕابردوو تاکو (2) کانوونی دووەمی (2024) هێرشەکان بۆ سەر سەربازانی ئەمەریکا لە عێراق و سووریا لە لایەن میلیشیا ئێرانییەکانەوە (106) هێرش بووە، ئێستا ئەو ژمارەیە بۆ زیاتر لە (130) هێرش و بەئامانجگرتنی هێزەکانی ئەمەریکا بەرزبووەتەوە."[3] دەتواندرێت ئاماژە بەوە بکرێت هێرشە درۆنییەکان لە کۆتاییەکانی کانوونی یەکەمی (2023)، و سەرەتاکانی کانوونی دووەمی (2024) زۆرتر بووبوونە کارێکی ڕۆژانەی میلیشیا ئێرانییەکان و بەبەردەوامی ئەنجامی دەدەن و زۆربەی جار گرووپە میلیشیاییەکان هەر زوو بەرپرسیاریەتی ئەنجامدانی هێرشەکانییان لە ئەستۆ دەگرن، بۆ نموونە چەندین جار "گرووپی مقاوەمەی ئیسلامی لە عێراق بەرپرسیاتییەتی هێرشەکانی لە ئەستۆ گرتووە."[4] ئەو گرووپە بە ئاشکرا بانگەشەی گەڕانەوە و نەمانی هێزەکانی هاوپەیمانیی نێودەوڵەتی و سەربازانی ئەمەریکا دەکەن و بوونی ئەوان بە تێکدانی دۆخی ناوچەکە هەژمار دەکەن.

ڕۆژی (31)ـی دیسەمبەری (2023) "فەڕەنسا بە تووندی ئیدانەی هێڕشە درۆنییە بێفڕۆکەوانەکانی سەر هەرێمی کوردستان کرد، بە گرنگی زانی بە خێرایی کۆتایی بەو کردەوە تووندوتیژییانە بهێندرێت، و داوای لە هەموو لایەنە جیاوازەکان کرد ڕێز لە یەکپارچەیی، و سەروەری عێراق بنرێت و سەقامگیری، ئارامی و ئاسایشی هەرێمی کوردستان بپارێزرێت."[5] فەڕەنسا هەمیشە جەختی لەسەر هەموو جۆرە هاوکارییەکی بۆ هەرێمی کوردستان کردووەتەوە و لە کاتە جیاوازە سەختەکاندا پاڵپشتی هەرێمی کوردستان بووە.

هەنگاوەکانی عێراق و هەرێمی کوردستان

ساڵی (2003) لە پرۆسەی ئازادکردنی عێراق سەربازانی ئەمەریکا هاتنە ناو خاکی عێراق، "دواتر هێزەکانی ئەمەریکا کشانەوە و سەربازانییان بۆ پارێزگاریکردن لە سەفارەتییان، یارمەتیدانی هێزە عێراقییەکان مابوونەوە بەشیوەیەک لە (2007) ژمارەی سەربازانی ئەمەریکا (170,000) سەرباز بوو. لەگەڵ سەرهەڵدانی شەڕی داعش لە (2014) وڵاتانی هاوپەیمانیی نێودەوڵەتی، یارمەتی سەربازی و مرۆییان پێشکەش بە عێراق و هەرێمی کوردستان دەکرد، لە (2017) ئەمەریکا ژمارەی سەربازانی لە (5000)وە بۆ (2500) سەرباز کەمکردەوە، هەروەها سەربازانی وڵاتانی هاوپەیمانان بوونییان هەبوو لەگەڵیاندا."[6] جیا لەوەی میلیشیا ئێرانییەکان لە دژی مانەوەی سەربازانی ئەمەریکا بوون، لە بەرانبەردا سەرکردەکانی عێراق مانەوەی هێزەکانی هاوپەیمانانییان بە گرنگ دەزانی هەمیشە جەختییان لەوە دەکردەوە کە عێراق بە دۆخی ئاسایش و ئەمنی ناسەقامگیردا دەڕوات و ئەزموون، مەشق و بوونی وڵاتانی هاوپەیمانان بە سەرکردایەتیی ئەمەریکا گرنگ و پێویستە. 

محەمەد شیاع سوودانی، سەرۆک وەزیرانی عێراق "هێرشکردنە سەر سەربازانی ئەمەریکا لە لایەن میلیشیا پاڵپشتیکەرە ئێرانییەکانەوە بە پێشێلکردنی سەروەری عێراق دانا، جەختی کردووەتەوە کە دیالۆگێکی بنەڕەتی پێویسە و گرنگە."[7] سەرۆک نێچیرڤان بارزانی، سەرۆکی هەرێمی کوردستان بەبەردەوامی جەختی لەسەر پاراستی سەروەری عێراق و هەرێمی کوردستان کردووەتەوە، بە نموونە "لە چوار ووتەی جیاواز کە لە کۆنفڕانسی جۆراوجۆردا پێشکەشی کردووە سەرۆکی هەرێمی کوردستان تیشکی خستووەتە سەر ئاشتی، سەقامگیری، ئاسایش و میکانیزمی چۆنییەتی بەدەستهێنانیانی باسکردووە. بە بڕوای سەرۆکی هەرێمی کوردستان یەکگرتوویی، بەدەستهێنانی بەرژەوەندی هاوبەش، جێبەجێکردنی مافە دەستوورییەکان کلیلی سەرەکی و تەنیا ڕێگەن بۆ بەدەستهێنانیان نەک تەنها لە عێراق، بەڵكو لە هەموو ڕۆژهەڵاتی ناوەڕاست."[8] کەواتە گەڕانەوە بۆ جێبەجێکردن و چەسپاندنی دەستوور وەک خۆی ئەرکی هەموو لایەنە جیاوازەکانە.

بە گوێرەی ڕاپۆرتێکی نوچەنێت، "ڕۆژی (9) ی کانوونی دووەمی (2024) سەرۆکى هەرێمى کوردستان لەگەڵ فه‌رمانده‌ی گشتیی هێزه‌كانی هاوپه‌یمانان له‌ عێراق و سووریا کۆبووەوە. لە کۆبوونەوەکەدا باس لە هاریکاریی هێزه‌کانی هاوپه‌یمانان له‌گه‌ڵ عێراق و هه‌رێمى كوردستان بۆ به‌ره‌نگاربوونه‌وه‌ى هه‌ڕه‌شه‌كانى تیرۆر و یارمه‌تیدانى سوپاى عێراق و پێشمه‌رگه‌ کرا. هاریکاریی هێزه‌کانی هاوپه‌یمانان له‌گه‌ڵ عێراق و هه‌رێمى كوردستان بۆ به‌ره‌نگاربوونه‌وه‌ى هه‌ڕه‌شه‌كانى تیرۆر و له‌ناوبردنى یه‌كجاره‌كیى داعش، یارمه‌تیدانى سوپاى عێراق و پێشمه‌رگه‌ به‌ مه‌شق و ڕاهێنان و ڕاوێژى سه‌ربازى، هه‌ڕه‌شه‌كانى تیرۆر له‌ عێراق و سووریا و له‌ ناوچه‌كه‌ به‌گشتى تاوتوێ كران. یه‌كخستنه‌وه‌ى پێشمه‌رگه‌، ئاڵۆزییه‌كانى ڕۆژهه‌ڵاتى ناوه‌ڕاست و شه‌ڕ له‌ غه‌ززه‌ و كاریگه‌رییه‌كانى له‌سه‌ر ناوچه‌كه‌ و چه‌ند پرسێكى دیكه‌ى جێى بایه‌خى هاوبه‌ش پرسی دیكه‌ى كۆبوونه‌وه‌كه‌ بوون. هەروەها لە کۆبوونەوەکەدا سەرۆک نێچیرڤان بارزانى و جه‌نه‌راڵ جۆوڵ ڤاوڵ جه‌ختیان له‌ پاراستنی هێزه‌كانى هاوپه‌یمانان و نێرده‌ دیپلۆماتییه‌كان له‌ عێراق كرده‌وه‌ و هاوڕا بوون كه‌ سه‌قامگیریى عێراق بۆ ته‌واوى ناوچه‌كه‌ پێویسته‌ و ده‌بێ هیچ ده‌رفه‌ت نه‌درێت تیرۆر سه‌رهه‌ڵبداته‌وه‌، هەر لە کۆبوونەوەکەیاندا باسیان له‌ هێرشه‌ درۆنییه‌كان له‌سه‌ر هه‌رێمى كوردستان کرد."[9] بەتایبەت ئەو هێڕشانەی کە لەو ماوەیەدا بە بەردەوامی ئەنجام دەدرێن.

سەرۆک نێچیرڤان بارزانی، سەرۆکی هەرێمی کوردستان لە بەرانبەر بابەت و پرسە جیاوازەکان کە لە کاتە جیاوازەکاندا ڕوودەدەن، بە بەردەوامی هەوڵی داوە و هەنگاوەکانی جێگەی بایەخ بوونە، زۆربەی کات چارەسەری پرسە جیاوازەکان تەنیا لای سەرۆک خۆی بووە. لە درێژەی سەردانێکی دوو ڕۆژەی سەرۆک بۆ بەغدا (14-13 ی کانوونی دووەمی 2024) چەندین کۆبوونەوەی جیاواز لەگەڵ لایەن و سەرکردە جیاوازەکانی عێراق ئەنجامدراون، لە نێو کۆبوونەوە گرنگەکاندا پرسی هێرشە درۆنییەکانی سەر هەرێمی کوردستان تەوەری سەرەکی بوون. بە نموونە لە ڕاگەیێندراوێکی سەرۆکایەتیی هەرێمی کوردستاندا هاتووە، "ڕۆژی (14 ی کانوونی دووەمی 2024) سەرۆک نێچیرڤان بارزانی، سەرۆکی هەرێمی کوردستان لەگەڵ فالح فه‌ییاز، سه‌رۆكى ده‌سته‌ى حه‌شدى ‌شه‌عبى كۆبووه‌وه‌. له‌ كۆبوونه‌وه‌كه‌دا باس لە دۆخى ئه‌منیى عێراق، هه‌ڕه‌شه‌، مه‌ترسییه‌كانى تیرۆر، هێرش و په‌لاماره‌كانى داعش بۆ سه‌ر هێزه‌ چه‌كداره‌كان و هێزه‌ ئه‌منییه‌كانى عێراق و هاووڵاتییان، دوایین پێشهاته‌كانى شه‌ڕ و ئاڵۆزیه‌كان و كاریگه‌رى و لێكه‌وته‌كانى به‌سه‌ر ناوچه‌كه‌وه‌ كراون.

سەرۆکی هەرێمی کوردستان و سەرۆکی دەستەی حەشدی شەعبی جه‌ختییان له‌وه‌ كردووەتەوە كه‌ ده‌بێ عێراق "نه‌كه‌وێته‌ ناو ئاڵۆزییه‌كانى ناوچه‌كه‌وه، پاراستنى ئارامى، سه‌قامگیرى، و به‌رژه‌وه‌ندیى باڵاى وڵات لە سەرووی هه‌مووان بێت. هه‌روه‌ها هاوڕا بوون كه‌ به‌ئامانجگرتنى پێشمه‌رگه‌ و هێرشه‌ درۆنییه‌كان له‌سه‌ر هه‌رێمى كوردستان، زیان به‌ ئارامى و سه‌قامگیریى عێراق و هه‌رێمى كوردستان ده‌گه‌یه‌نێت."[10] ئاشکرایە پێشێلکردنی سەروەریی عێراق و هەرێـی کوردستان تێکدانی ئارامی، سەقامگیری، ئاسایش، و پێشێلکردنی دەستووری کۆماری عێراقی فیدڕاڵە.

کاردانەوەی ئەمەریکا

ئەمەریکا بێدەنگ و بێکردار نەوەستاوە لە بەرانبەر هێڕشە درۆنییەکانیی میلیشیا ئێرانییەکان بۆ سەر سەربازەکانی لە عێراق و سووريا، بەڵکو کاردانەوەی هەبووە لە ئەنجامدانی هەر جۆرە هێرش و پەلامارێکدا کە دەکرێتەسەر سەربازانیان. بە گوێرەی هەواڵێكی ماڵپەڕی رووداو ڕۆژی (4)ـى کانوونی دووەمی (2024) هێرش کراوەتەسەر بارەگەیەکی حەشدی شەعبی لە بەغدا، دوای رووداوەکە فەرماندەیی ئۆپراسیۆنەکانی پێشتێنەی بەغدای حەشدی شەعبی لە ڕاگەیێندراوێکدا گوتی، کە حاجی ئەبو تەقوا سەعیدی، جێگری ئۆپراسیۆنەکانی پشتێنەی بەغدای حەشدی شەعبی لە هێرشەکەدا کوژراوە، هەروەها گوتی هێرشەکە لەلایەن ئەمەریکاوە ئەنجامدراوە لە بەرامبەر هێرشی گرووپە چەکدارەکانی نزیک لە ئێران بۆ سەر هێزەکانیان لە سووریا و عێراق.

ئەمەریکا بەردەوام جەختدەکاتەوە کە دوودڵ نابن لە پاراستنی هێزەکانیان و وەڵامدانەوەی هێرشی گرووپە چەکدارەکان. ماتیو میللەر، وتەبێژی وەزارەتی دەرەوەی ئەمریکا دەڵێت، ئێمە دوودڵ نابین بۆ بەرگریکردن لەخۆمان هەر کاتێک پێویستبکات، هەمووان لە رابردوودا ئەوەتان بینیوە.[11] دواتریش بە فەرمی ڕاگەیێندرا کە هێڕشەکەی بەغدا لە لایەن ئەمەریکاوە ئەنجام دراوە.

هەر لە بەرانبەر هێڕشە درۆنییەکان و بەئامانجگرتنی بەردەوامی هێزەکانی ئەمەریکا، لە کۆتایی ساڵی (2023)  "وەزیری بەرگری ئەمەریکا پێشنیاری کرد ساڵی (2024) پلانێکی کرداری جێبەجێ بکرێت بۆ دابینکردنی توانای بەرگریی ئاسمانی و موشەکی و دژە فڕۆکەی بێفڕۆکەوان بۆ پێشمەرگە و هێزە ئەمنییەکانی عێراق لەژێر هێرشی بەردەوام لەلایەن ئێران و هێزەکانی لە ناوچەکەدا."[12] بەمەش چاوەڕوان دەکرێت پێکانی ئامانجی میلیشیا ئێرانییەکان لە هێرش و پەلامارەکانیاندا کەم بێتەوە و هێرشەکان ئەو ئەنجامانەیان نەبێت کە گرووپە میلیشیاییەکان چاوەڕێ دەکەن، هەروەها چیتر هاووڵاتیانی سڤیل نەبنە قوربانی بەردەوامی تووند و تیژییەکانی ناوچەکە.

دوایین گۆڕانكارييەكان

بە گوێرەی ڕاپۆرتێکی ڕۆیتەرز "ئەمەریکا (900) سەربازی لە سووریا، (2500) سەربازی لە عێراق هەیە، ئەگەرچی سەرۆک وەزیرانی عێراق لەسەرەتای کانوونی دووەمی (2024) باسی لە ئامادەکاری عێراق بۆ کۆتایی هێنان بە ئەرکی هێزەکانی هاوپەیمانیی نێودەوڵەتی بە سەرکردایەتی ئەمەریکا لە عێراق کردبوو"[13] هەروەها ڕایگەیاندبوو کە "گۆڕانکاری لە پەیوەندییەکان دەکەن لەگەڵ هێزەکانی هاوپەیمان لە ئەگەری بەردەوامی هێرش و پەلامارەکانی وڵاتانی هاوپەیمان و میلیشیا ئێرانییەکان بۆ سەر یەکتر"،[14] بەڵام لە (9) ی کانوونی دووەمی (2024) "ڕاوێژکارانی باڵای محەمەد شیاع سوودانی، سەرۆک وەزیرانی عێراق ئاماژەیان بۆ ئەوە کردووە، كە ڕاگەیاندنی باسکردنی کۆتایی هێنان بە کارەکانی هێزەکانی ئەمەریکا هەوڵێک بووە بۆ ڕازیکردنی لایەنە سیاسییە جیاوازەکان لە کاتی ئێستادا، خودی سەرۆک وەزیرانی عێراق بە شێوەیەکی نهێنی لەگەڵ مانەوەی هێزەکانی هاوپەیمانی نێودەوڵەتییە، بوونی ئەوان بە گرنگ دادەنێت بۆ پێشهاتەکانی داهاتوو."[15] بەڵام داهاتوو ڕوونتر چارەنووس و پێشهاتەکان دیاردەخات دەربارەی مانەوە و کارەکانی هێزەکانی هاوپەیمانیی نێودەوڵەتی و چۆنیەتی هەماهەنگییەکانییان لە عێراق و هەرێمی کوردستاندا.

ئاشکرایە لە دوای (2003) وە بەدیاریکراوی عێراق وڵاتێکی سەقامگیر نەبووە بە تایبەت لە ڕووی سیاسییەوە، ناکۆکییە سیاسییەکان بوونی هەبووە، هەرێمی کوردستانیش وەک هەرێمێك لە چوارچێوەی عێراقدا بێگومان پرووشکی ئەو ناکۆکییانەی بەرکەوتووە جا چ هەبوونی ناکۆکی سیاسی بێت لەگەڵ عێراقدا یاخود کێشە ناوخۆییە سیاسییەکان لە ناوخۆی هەرێمدا و هەوڵدان بۆ دۆزینەوەی ڕێگە چارەی جیاواز بۆ چارەسەرکردنییان، و ڕێگریکردن لە تەشەنەکردنی زیاتری ئەو ناکۆکییانە. ڕوونە بۆ گرووپە تووندڕەوە جیاوازەکان ئاسانترە دووبەرەکی، ناکۆکی، هێرش ئەنجام بدەن لەو وڵات و ناوچانەی کە خۆیان ئارام نین یاخود شەڕ لە ئارادایە تیایدا بۆ نموونە وڵاتێکی وەک سووریا، چونکە ژینگە و دەرفەت زیاتر گونجاو دەبێت بۆ بەجێگەیاندنی ئامانجە جیاوازەکانییان.

[1] The Muqawama and Its Enemies, Shifting Patterns in Iran-Backed Shiite Militia Activity in Iraq. Acleddata.com. 2023, https://acleddata.com/2023/05/23/the-muqawama-and-its-enemies-shifting-patterns-in-iran-backed-shiite-militia-activity-in-iraq/#s1

2 سنور، یاسین. پەلاماری میلیشیاکان بۆ سەر هەرێمی کوردستان و پێشێلکردنی دەستووری عێراق. نوچەنێت.٢٠٢٣، https://www.nuche.net/post-13418.html

[3] Staff Writer with AFP, Drone attacks on Iraqi Kurdistan Military Base. The defense post.com.2024, https://www.thedefensepost.com/2024/01/02/drone-iraqi-kurdistan-base/#google_vignette

[4] Armed Drone Shot down near US basein Northern Iraq.Reutwrs.com. 2023,https://www.reuters.com/world/middle-east/armed-drone-shot-down-near-us-base-northern-iraq-2023-12-31/

[5] Attack in Iraqi Kurdistan (31 December, 2023 2023), diplomatie.gouv.fr.2023, https://www.diplomatie.gouv.fr/en/country-files/iraq/news/article/attack-in-iraqi-kurdistan-31-dec-2023

[6] Mahmoud,Sinan. Iraq Plans to end Presence of US-Led Coalition Forces PM Says. Thenational news.com.2023, https://www.thenationalnews.com/mena/iraq/2023/12/28/iraq-plans-to-end-the-presence-of-us-led-coalition-forces-pm-says/

[7] Iraqi’s Prime Minister Claims to initiate Dialogue for Complete American Troop withdrawal. United against nucleariran.com.2024,https://www.unitedagainstnucleariran.com/proxies-partners/iraqs-prime-minister-claims-to-initiate-dialogue-for-complete-american-troop

[8] Qadir, J. The roadmap to peace critical perspectives on the Speeches of President Nechirvan Barzani Collection of Essays. Berdan Printing House, 2023. 350-352.

[9]هەواڵنێر، سەرۆک نێچیرڤان بارزانی لەگەڵ شاندێكی هاوپەیمانان هێرشە درۆنییەکانی سەر هەرێمی کوردستان تاوتوێ دەکەن. نوچەنێت.٢٠٢٤، https://www.nuche.net/post-14913.html

[10] President Nechirvan Barzani Meets with Chairman pf the Popular Mobilization Forces Commission Faleh al-Fayaz. Presidency.gov.krd.2024, https://presidency.gov.krd/en/president-nechirvan-barzani-met-with-the-head-of-the-hashd-al-shaabi-committee/

 11بزووتنەوەی نەجەبا کوژرانی حاجی ئەبو تەقوای پشتڕاستکردەوە. رووداو.٢٠٢٤https://www.rudaw.net/sorani/middleeast/iraq/040120242

[12] Press Releases Rep.Don Bacon on NDAA Passage. Bacon. House.gov, 2023, https://bacon.house.gov/news/documentsingle.aspx?DocumentID=1380

[13] Ahmed Rasheed, and Steward, P. Iraq Prepares to c;lose down US-Led Coalitions mission PM. Reuters.com. 2024, https://www.reuters.com/world/middle-east/iraq-prepares-close-down-us-led-coalitions-mission-pm-statement-2024-01-05/

[14] Menmy, D. Iraqi’s PM Says Government Working to end Presence of US-Led Coalition forces in the country. Newarab.com, 2023, https://www.newarab.com/news/iraq-moving-end-presence-us-led-coalition-troops-pm

[15] Lara Seligman, and Banco, E. Iraqi officials privately Signal they want US Forces to stay. Politico.2024, https://www.politico.com/news/2024/01/09/iraq-us-troops-removal-00134564