Nuce Logo

لە ماوەى چەند رۆءژى رابردوو سەرۆکى هەرێمى کوردستان پێشوازیی لە چەندین شاندى وڵاتانى جیهان کردووە، هەر ئەمڕۆش پێشوازی لە روبن بریکلمانس، وەزیری بەرگریی هۆڵەندا و شاندێکی یاوەری کرد، ماڵپەڕى رووداو بڵاوى کردەوە،  سەرۆک نێچیرڤان بارزانی لەگەڵ هەریەک لە ئەمریکا، فەڕەنسا، بەریتانیا و تورکیا لە بارەی بارودۆخی سووریا لە پەیوەندیدایە.
ماڵپەڕەکە نووسیوویەتى، ئەمریکا، بەریتانیا و وڵاتانی ئەورووپا دەیانەوێت بۆچوونی نێچیرڤان بارزانی سەرۆکی هەرێمی کوردستان لە بارەی گۆڕانکارییەکانی ناوچەکە و بەتایبەت سووریا بزانن.
سەرۆکی هەرێمی کوردستان لە کۆبوونەوەکاندا جەختی کردووە لەسەر ئەوەی پێویستە هەوموو لایەک هەوڵ بدەن بۆ پاراستنی ئارامی و سەقامگیری سووریا و لەو نێوەدا ماف و پێگەی کورد بپارێزرێت،  وڵاتانی رۆژئاوایی بۆچوونی سەرۆکی هەرێمی کوردستانیان لەبارەی مانەوەی هێزەکانی هاوپەیمانی دژی داعش لە عێراق و سووریا وەرگرتووە.  
سەرۆکى هەرێمى کوردستان بە پێویستی دەزانێت، هاوپەیمانی دژی داعش لە عێراق بمێنێت. چەندین جاریش رایگەیاندووە کە مەترسی داعش هێشتا ماوە. 
لەم مانگەدا، ژمارەیەک شاندی سەربازی وڵاتانی زلهێز و کاریگەر سەردانی هەولێریان کردووە و لەگەڵ سەرۆکی هەرێمی کوردستان کۆبوونەتەوە.  

رۆژی پێنجشه‌ممه (2024/12/12)  سەرۆکی هەرێمی کوردستان، پێشوازیی له‌ بۆریس پیستۆریوس، وەزیری بەرگریی ئەڵمانیا کرد، هەر هەمان رۆژ لەگەڵ ئەدمیراڵ سێر ئه‌نتۆنی راداکين، سوپاسالاری بەریتانیا و شاندێکی پایەبەرزی سەربازی و دیپلۆماسیی یاوەری، کۆبووەوە. 

 لە بەردەوامی کۆبوونەوەکانی لەگەڵ بەرپرسانی وڵاتانی رۆژئاوایی، رۆژی سێشه‌ممه‌ (2024/12/17) سەرۆک نێچيرڤان بارزانى،پێشوازی لە جه‌نه‌راڵ كێڤن لێيهى، فەرماندەی هێزەکانی هاوپەیمانيی نێودەوڵەتی لە عێراق و سووریا کرد و رۆژی یەکشەممە، پێشوازی لە گۆیدۆ کرۆسێتۆ، وەزیری بەرگریی ئیتاڵیا کرد و ئەمڕۆ دووشه‌ممه‌ (2024/12/23) سەرۆکى هەرێمى کوردستان پێشوازیی لە روبن بریکلمانس، وەزیری بەرگریی هۆڵەندا و شاندێکی یاوەری کرد. بەپێی راگەیێنراوی کۆبوونەوەکە، هەردوولا جەختیان لەسەر بره‌ودان به‌ هه‌موو بواره‌کانی په‌یوه‌ندی و گرنگیی بەردەوامیی هەماهەنگیی نێوان هێزەکانی پێشمەرگە و سوپای عێراق و هێزە هۆڵەندییەکان لە چوارچێوەی هاوپەیمانیی نێودەوڵەتی بۆ بەرەنگاربوونەوەی تیرۆردا، کردەوە.هەر کۆبوونەوەکەدا باس لە دۆخی سیاسی و ئەمنیی عێراق و ناوچەکە و رۆڵی هەرێمی کوردستان لە پتەوکردنی سەقامگیریدا کراوە و هەوڵەکانی چاکسازی و یه‌کخستنه‌وه‌ی پێشمه‌رگه‌ لە چوارچێوه‌ی وه‌زاره‌تی کاروباری پێشمەرگەدا، خراوەتە بەر باس.بابەتێکی دیکەی سەردانی ئەو شاندە سەربازییانە، بەسەرکردنەوەی ئەو هێزانەیانە کە لە عێراق و هەرێمی کوردستانن، کە بە بۆنەی سەری ساڵ و کریسمسەوە سەردانیان دەکەن.