Nuce Logo

ئەمڕۆ پێنجشەممە (20/حوزەیران/ 2024) لەگەڵ هاتنى یەکەم رۆژى وەرزى هاوین بەرگریى شارستانى هەرێمى کوردستان راگەیێندراوێکى تێێدا داوا دەکات هاووڵاتیان بۆ خۆپاراستن پابەندى ئەو رێنماییانە بن.

دەقى ڕاگەیێندراوى بەرگریى شارستانى هەولێر:

هاووڵاتییانی بەڕێز، لەگەڵ هاتنی یەکەم ڕۆژی وەرزی هاویندا، بۆ خۆپاراستنتان، ئەم ڕێنماییانە جێبەجێ بکەن:

1- خواردنەوە گازییەکان بەهەموو جۆرەکانییەوە، لە ناو ئۆتۆمبێلدا بەکار مەهێنن، هەمـوو جۆرە چەرخێک، بتڵی ئاو، بۆن و پاوەربانک و ئامێرە ئەلکترۆنییەکان لە ناو ئۆتۆمبێل دووربخەنەوە.

2- پێویستە لە کاتی وەستاندا، پەنجەرەی ئۆتۆمبێل کەمێک بکرێتەوە.

3- پڕنەکردنی تانکیی سووتەمەنیی ئۆتۆمبێل بە تەواوی.

4- تایەی ئۆتۆمبێل زیاتر لە پێویست پڕ مەکەنەوە، بەتایبەتی بۆ ڕێگە دوورەکان.

5- خواردنەوەی بڕێکی زۆر ئاو و شلەی جۆراوجۆر بەتایبەت لە کاتی بەرکەوتنی تیشکی خۆر.

6- لەبەر تیشکی خۆر بوتڵی غازی چێشتلێنان دامەنێن.

7- دڵنیا بن لەوەی سویچی کارەبا لۆدی زۆریان لەسەر نەبێت، ئەیرکۆندیشن با کار نەکات، تەنها لەو شوێنانە نەبێت کە خێزانەکە یان کەسێک لەوێ بێت.

8- وایەرەکانی کارەبا لۆدی زیاد لە توانای دیاریکراوی خۆیان نەخرێتە سەر و بەکارنەهێنانی تەقسیمی کارەبایی بۆ چەند ئامێرێک.

9- دوورکەوتنەوە لە بەرکەوتنی ڕاستەوخۆی تیشکی خۆر بەتایبەتی لە ماوەی کاتژمێر 11 ی بەیانی تا 3 ی پاش نیوەڕۆ.

10- کوژاندنەوەی ئامێرە کارەباییە زیادەکان بۆ کەمکردنەوەی بارقورسیی تۆڕەکانی کارەبا.

11- پێویستە خاوەنمۆلیدەکان گەیەنەری کوالیتیی بەرز دابنێن و وایەری جاڵجاڵۆکەی هەڕەمەکی بەکار نەهێنن.

12- پاشماوەی دروێنەی بەروبوومی گەنم و جۆ نەسوتێنرێت بە مەبەستی ئامادەکردنی زەوی بۆ چاندنی دووبارە؛ بکەری ئەو کارە ڕووبەڕووی لێپرسینەوەی یاسایی دەکرێتەوە.

13- بە هەموو جۆرێک مەلەکردن لە ڕووبار و چەمەکان قەدەغەیە، جگە مەلەوانگە ڕێگەپێدراوەکان.

14- دابینکردنی هەموو پێداویستییەکانی سەلامەتی لە مەلەوانگەکان و ڕێنماییکردنی مەلەوانان بە ڕێنماییی مەلەوانگەکان.

15- بەکارهێنانی چەتری پارێزەر لە تیشکی بەتینی خۆر، ڕێکارێکی گرنگە بۆ سەلامەتیی پێست.

16- لە کاتی هەر ڕووداوێکی نەخوازراو پەیوەندی بە تەلەفۆنی بەرگریی شارستانی، ژمارە ١١٥ ـەوە بکەن.

بەرگریی شارستانیی هەرێم