Nuce Logo

لە بارەی ناساندنی ڕێکخراوەکە، ئەندامێکی دەستەی ڕاوێژکاری لە فیدراسیۆنی ژنانی دیاسپۆرا، دەڵێت: رێکخراوێکی مەدەنییە لە لایەن کۆمەڵیک چالاکوانانی پرسی ژنان، لە ناوەوەو دەرەوەی وڵات بەمەبەستی یەکحستنی تواناکان و لۆبی گەری بۆدروست بونی کاریگەری کۆمەڵایەتی و سیاسی لە کۆمەَڵگەدا کە گونجاو بێت لەگەڵ گۆرانکاڕییەکانی سەردەم، ھەروەھا تواناسازی و بەشداری کاریگەرانەی ژن لەگەڵ ئامانجە نەتەوەیی و نیشتمانییەکان و دەرخستنی خەباتی ژنی کورد بۆ ھاوکاری و ھەماھەنگی و لەگەڵ رێکخراوە نێودەولەَتییەکان و دەزگاکانی تری پەیوەندار، چالاکی ئەنجام دەدەین و هەوڵ دەدەین بۆ بنیادنانی کۆمەڵگەیەکی دیموکرات و دامەزراوە.

تاڤگە عومەر، سەبارەت بە ئامانجەکانی ڕێکخراوەکەیان دەڵێت: لە ساڵی2002 فیدراسیۆنەکەمان دامەزرا. چەند ئامانجێکی سەرەکیمان هەیە کە دەتوانین بەم شێوەیە پۆلێنی بکەین:

لەسەر ئاستی ناوخۆیی، گشتی و نێودەوڵەتی کاردەکەین

یەکەم: لەسەر ئاستی گشتی: وەکو:  گەشەپێدانی تواناکانی ئافرەتان بە بیرو بۆچوون و ئایدیا نوێیەکانی سەر چارەسەرکردنی کێشەکان و ئاستەنگەکانی بەردەم پێشکەوتنی ئافرەتان لە کایە جیاوازەکاندا بە گونجاندنی لەگەڵ دەقی یاسا کارپێکراوەکان و ڕەوتی ئافرەتان لە وڵاتان و جێبەجێ کردنی رێککەوتنامەو پەیماننامە نێودەوڵەتییەکان و بڕیارەکانی ئەنجومەنی ئاسایشی نێودەوڵەتی و راسپاردەی وڵاتانی ئەندام لە کۆمەڵەی گشتی نەتەوە یەکگرتوەکان، تایبەت بە پرسی ئافرەتان و رەنگدانەوەی لە دەستورو یاسای وڵاتان.

 هەروەها زامن کردنی پاراستنی کۆمەڵایەتی و پەیوەندییە کۆمەڵایەتیەکان بۆ گەیشتنی ژن بە پێگەی بریار بە لەبەرچاوگرتنی تواناکانیان. سەبارەت بە بەشداریکردنی ئافرەتان لە بوارو چالاکییەکان جیاوازەکاندا، بۆئەوەی بەشداری کارایان هەبێت لە سەر ئاستی نێوخۆیی و نێودەوڵەتی بەمەبەستی سوود وەرگرتن لە ئەزمونی پێشکەوتوی وڵاتان و ھاوکاری و ھەماھەنگی کردن لەگەڵ لایەنە بەشداربووە پەیوەندارەکان، ھەروەھا ھوشیارکردنەوەی ئافرەتان بە بنەماکانی مافی مرۆڤ و مافەکانی ئافرەتان و بە تایبەتیش چینی گەنجان و پاڵپشتی کردنیان بۆ بەدەستھێنانی مافەکانیان.

دووەم: لەسەر ئاستی کوردستان، ئامانجمان ڕێگریکردنە لە ئەنجامدانی ھەموو جۆرە توندوتیژیەک لەسەر بنەمای رەگەزی و جۆری کۆمەڵایەتی، بەتایبەت نادادپەروەری و جیاکاری لە مافەکانی ئافرەت و رووبەرووبونەوەی گێچەڵی سێکسی لە شوێنی کارو ھەوڵدان بۆ شیاندنەوەی قوربانییەکان بە گوێرەی شوێنی ئەنجامدانی توندوتیژی و یاسا بەرکارەکان، هەر لەسەر ئاستی ناوخۆ ئامانجی فیدراسیۆنەکەمانە هەوڵ بدەین بۆ هەموارکردنەوەی ئەو یاسا نیشتیمانیانی و بەرکارانەی کە جیاکارییان تێدایەو هەوڵدان بۆ دووبارە داڕشتنەوەیان بە لەبەرچاوگرتنی جۆری کۆمەڵایەتی و یەکسانی.

قسەیەک هەیە دەگوترێ، ئافرەتان تاکو نەبنە خاوەن ئابوری سەربەخۆ ئازاد نابن، ئایا هەوڵی ئەم فیدراسیۆنە لەم بارەیەوە چییە؟ تاڤگە عومەر گوتی " بەشداری ئافرەتان لە کەرتی ئابوری، خاڵێکی گرنگی کارنامەی ئێمەیە، هەروەها کارکردن لەگەڵ دامەزراوەکانی کوردستان بۆ جێبەجێ کردنی رێککەوتنامەو پەیماننامە نێودەوڵەتییەکان و بڕیارەکانی ئەنجوومەنی ئاسایشی نێودەوڵەتی و راسپاردەی وڵاتانی ئەندام لە کۆمەڵەی گشتی نەتەوە یەکگرتوەکان تایبەت بە پرسی ئافرەتان".

کارکردنی ئافرەتان لە کەرتی ئابوری یەک لە ئامانجەکانمانە

تاڤگە عومەر جەخت لەوە دەکاتەوە، کە ئەوان لەسەر ئاستی نێودەوڵەتیش کار لەسەر پرسەکانی ئافرەتان دەکەن، وەکو: ناساندنی پرسی نەتەوەییمان، بە لۆبی کردن و ئەنجامدانی چالاکی مەدەنی لەسەر ئاستی وڵاتان و ناوەندە نێودەوڵەتییەکان. هەروەها هاندانی ئافرەتانی کوردستان، بۆ بەشداریکردن لە هەڵبژاردنی وڵاتان و پاڵپشتیکردنیان لە پێگە و ئەرکەکانیان و سەرخستنیان. هاوکات نیشاندانی ڕەوشی کوردستانییان و ئافرەتانی کوردستان، لە سایەی ڕژێمە دەسەڵاتدارەکانی ناوچەکە.

لە بارەی شێوازی کارکردنی فیراسیۆنی ژنانی دیاسپۆرا، تاڤگە عومەر گوتی: دامەزراوەی فیدراسیۆنی ژنانی دیاسپۆرای کوردستانی، بە گشتی ھەڵگری پەیامێکی گشتگیرە. بۆ ئەو مەبەستە دەتوانێت نوێنەرایەتی ژنانی کوردستانی بکات لە زۆر بواردا، بەڵام سەرەکیترین کاری فیدراسیۆن، کۆدەنگی و کۆکردنەوەی رێکخراوەکان و چالاکوانانی ژنی کوردستانییە لە ژێر چەتریک ک بتوانێت داکۆکی بکات، لە لایەک

و لە لایەکی تریشەوە، کاریگەر بێت لە گەیاندنی پەیامی ھاوبەش بە ناوەندەکانی بڕیار بە چالاکی و بیری ھاوبەش لە بەدەست ھێنانی مافەکانی ژنان و لۆبی ژنی کورد، لە ناو کوردستان و دەرەوەی کوردستان.

ئایا توانیویانە، لەسەر پرسەکانی ئافرەتان هەماهەنگی لەگەڵ ژنە چالاکەکانی ناوخۆبکەن؟ تاڤگە ئەم کارە بەیەکێک لە ئامانجە سەرەکییەکانیان وەسف دەکات، کە دروستکردنی ھەماھەنگی و سود وەرگرتن لە ئەزمونی ووڵاتان لەم روانگەیەشەوە پەیوەندی باشمان دروست کردوەو بە تایبەتیش، کە ستافی کارا زۆربەیانی لە کوردستانن و ئەرکەکانیان لێرە ئەنجام دەدەن و جگە لەوەش لە رێگەی کۆمیتەکانمان لە وڵاتانی ئەوروپا پەیوەندی دامەزراوەیی ئەنجام دراوەو ژمارەیەکی بەرچاوی کەسایەتی و رێکخراوەکان بونەتە ئەندامی فیدراسیۆن و ئامادەییان پیشانداوە، بۆ ئەنجامدانی پڕۆژەی هاوبەش چ لە کوردستان بێت یان لە دەرەوەی وڵات.

ئایا کارکردنی چالاکانی ئافرەت لە ناوخۆ و دەرەوەی وڵای جیاوازی چییە؟ تاڤگە عومەر جەخت لەوە دەکاتەوە، کە ژنانی دیاسپۆرا لە کەش و هەوایەکی تەواو دیموکراتی کاردەکەن بە پێچەوانەوە لێرە دەبێت خەباتێکی زۆر بکەین بۆ شکاندنی بەربەستەکان.