Nuce Logo

وەرگێرانی: ئیسماعیل تەها

بڕيارى دادگاى توركيا سەبارەت بە قەدەغەكردنى كارى سياسى لە ئەكرەم ئيمامئۆغلۆ، سەرۆكى شارەوانى ئيستەنبۆڵ گفتوگۆ و پرسيارى زۆر لەسەر ئەو دەستەكەوەكانی ئەم دادگاییكردنە دروستكردووە، كە ئايا دەستكەوتەكانى ئيمامئۆغلۆ چى دەبێت، چ كاريگەرييەك لەسەر مێزە شەش كەسيەكە بۆ دياريكردنى كانديدێكى هاوبەش دروست دەكات؟

چاودێرانى سياسى پێيانوايە،  كەمال كليچدارئۆغلۆ ڤيتۆ لەسەر سەرۆكى شارەوانى ئەنقەرە و ئيستەنبۆڵ دادەنێت و رێگەنادات خۆيان كانديد بكەن، لە هەمانكات ميراڵ ئەكشنار، سەرۆكى پارتى باشە سوورە لەسەر كانديدكردنى يەكێك لەم دوو سەرۆك شارەوانييە، بەگوێرەى هەڵسەنگاندنەكانى لەناخۆى حزبەكەى پێيوايە كليچدار ئۆغلۆ ناتوانێت لە هەڵبژاردنى سەرۆكايەتى سەركەوتن بەدەستبهێنێت.
جێبەجێكردنى بڕيارەكەى دادگا پێويستى بە چەند مانگێك ياخود ساڵێك بۆ دوو ساڵ هەيە، چونكە جارێكی تر دەبردرێتە بەر تەمیزكردنەوەی بڕیارەكە لە رێگەی دادگای باڵاو و تێهەڵچوونەوە، كەواتە ئەو حكومەی دادگا نابێتە رێگر لەبەردەم خۆكانديدكردنى ئيمامئۆغلۆ بۆ پۆستى سەرۆكايەتى، ياخود بەردەوامیدان بە كارەكانی لە سەرۆكايەتى شارەوانى ئيستەنبۆڵ.

عەبدولقادر سێڵڤى، بەو بڕيارە خۆشحاڵ نييە

عەبدولقادر سێڵڤى، نووسەرى نزيك لە پارتى دادوگەشەپێدان لە راپۆرتێكدا باس لەوە دەكات دژ بە قەدەغەكردنى كاری سياسییە لە ئيمامئۆغلۆ و دەڵێت، "هيچ راستييەك لە بڕيارى لەم جۆرە دژ بە ئيمامئۆغلۆ نابينم، ئەو بڕیارەش وەك بڕيارەكەى پێشووە دژ بە ئەردۆغان."
لە بەشێكى ترى قسەكانى دەڵێت، "پێويستە سياسەت لە رێگەى هەڵبژاردن و سندوقى دەنگدان بێت، نەك قەدەغەكردنى كاری سياسى كە دادگاكان دەيسەپێنن."
لە بەشێكى ترى قسەكانى جەخت لەسەر ئەوە دەكاتەوە، "ئەوە ئيمامئۆغلۆ نييە بەتەنيا باجەكەى دەدات، بەڵكو ديموكراسى توركى بەگشتى باجەكەى دەدات، ئەردۆغانيش بەو بڕيارە خۆشحاڵ نييە."

بەر لە (15) رۆژ پێش ئەو بڕيارە ئيمامئۆغلۆ چى گوت؟

بارێش يەركەداش، پەرلەمانتارى پێشووى پارتى گەلى كۆمارى و رۆژنامەنووسى بەناوبانگى تورك دەڵێت، "ئيمامئۆغلۆ لە رێگەى هەڵسوكەوتى ستراتيژى توانى ئەو دۆخە بخاتە بەرژەوەندى خۆى، بەوەی توانى ناياسايى ئەو دۆسييە بكات بە مادەيەكى بانگەشە بۆ بەرژەوەندى خۆى، هەر خۆشى سەركردايەتى ئاڕاستەكردنى پڕۆسەكەى كرد."
ئەو رۆژنامەنووسە توركە پێيوايە دۆسيەى ئيمامئۆغلۆ نالۆژيكيە، دەبێتە خاڵى دەستپێكى بۆ كانديدكردنى، ئەو سەرۆك شارەوانییە (15) رۆژ پێش ئێستا رايگەياند، "لە مانگى كانوونى يەكەم دۆخەكە لەبەرژەوەنديم دەگۆڕێت." ئەوەش ئاماژە بەوەى كە ئاگادارى پێشوختەى لەو بڕيارەى دادگا هەيە.
يەركەداش ئاماژە بەوەش دەكات ئەو سزايەى دادگا ئيمامئۆغلۆى وەك قوربانى دەرخستووە، كە ئەوەش بەو واتايە نايەت پاڵپشتى مێزە شەش كەسيەكە بۆ كانديدبوون بەدەستبهێنێت، چونكە هەڵوێستى كليچدار ئۆغلۆ لەپرسى كانديدنكردنی روونە، ئەو دۆسيە دەبێتە سەرهەڵدانى گفتوگۆى نوێ بەتايبەت لەناو پارتى گەلى كۆمارى.
لەدواى بڕيارەكەى دادگا لەسەر بانگێشتى ئيمامئۆغلۆ ميراڵ ئەكشنار گەيشتە ئيستەنبۆڵ و شانبەشانى سەرۆكی شارەوانی لەگەڵ خەڵك لە گۆڕەپانى بەرانبەر باڵەخانەی شارەوانى وەستا.
لەم دواييە ئەكشنار هيچ هيوايەكى بە مەنسوور ياڤاش نەمابوو، بۆيە ئامادەيى نيشاندا تا ئاراستەكەى بەرانبەر ئيمامئۆغلۆ بگۆڕێت و لەتەنيشتييەوە دەركەوێت وەڵامى بانگێشتەكەى بداتەوە بۆ ئەوەى لەو كاتەى كليچدار ئۆغلۆ سەرقاڵى گەشتێك بوو لە ئەڵمانيا لە تەنيشت سەرۆكى شارەوانى بووەستێت.
ئەو نووسەرە پێيوايە ئەو دۆخە وەك ئەوەيە كە كاتێك ئەردۆغان زيندانى كرا و كارى سياسى لێقەدەغەكرا هەڵەبوون، ئێستاش ئەوەى پێيوابێت ئيمامئۆغلۆ كۆتاييهاتووە ئەويش هەڵەيە.
ئيمامئۆغلۆ ئەوەى دەيويست بەدەستيهێنا
محەمەد برلاس، نووسەرى نزيك لە حكومەتى توركيا دەڵێت، "ئيمامئۆغلۆ ئەوەى دەيويست بەدەستيهێنا، ئەو بڕيارە هەرچەندە كۆتايى نييە و رێگرى كانديدبوونيشى لێناكات، ئەگەر بووە كانديدى سەرۆكايەتى و هەڵبژێردرا، ئەوە دادگاييەكە دەوەستێت."

ئەو نووسەرە پێيوايە ئەو بڕيارە بۆتە رێڕەوى ژيانى ئيمامئۆغلۆ، كە پێشتر وێنەى سەرۆك شارەوانييەكى شكستخواردى بەرانبەر جەماوەرەكەى هەبوو، بە دوور نازاندرێت ئيمامئۆغلۆ وەك كارتێكى پێشبڕكێ لە ململانێى سەرۆكايەتى لەگەڵ كليچدار ئۆغلۆ بەكارى بهێنێت."
ناكۆكييەكانى ناو مێزە شەش كەسييەكە كۆتايى نەهاتووە

مەحموود ئۆڤەر نووسەری تورك دەڵێت، "ناكۆكييەكانى پارتەكانی مێزە شەش كەسييەكە كۆتايى نەهاتووە، ئەكشنار ئيمامئۆغلۆ و ياڤاش هان دەدات، ئامانج لەو هەوڵەى رێگرييە لەوەى كليچدار ئۆغلۆ خۆى بۆ سەرۆكايەتى كانديد بكات."
لە بەشێكى ترى قسەكانى دەڵێت، "ئەكشنار كار لەسەر سەپاندنى ئيمامئۆغلۆ بەسەر مێزە شەش كەسيەكە دەكات، ياخود كار لەسەر هەڵوەشەندانەوەى مێزەكە و ئاڕاستەى هەڵبژاردنەكان بەرەو تەنيایی دەكات، ئەوەش بەهۆى ترسييەتى لە كاريگەرى نەرێنى پارتەكەى كە ئەگەر كليچدار ئۆغلۆ خۆى بۆ سەرۆكايەتى كانديد بكات، چونكە بژاردەى يەكەمى ئەكشنار رێگە نەدانە بە كليچدار، بۆيە بە ئاشكرا پاڵپشتى ئيمامئۆغلۆ دەكات و لەناوخۆش فشار لەسەر جەهەپە دەكات، پێشى وايە هەڵوەشاندنەوەى مێزەكە باجێكى گەورەى دەوێت.

ئەكشنار گەورترين براوەيە 

كوبڕا پار، نووسەرى تورك باس لەوە دەكات لەو بڕيارەى دادگا دژ بە سەرۆكى شارەوانى ئيستەنبۆڵ داويەتى، ميراڵ ئەكشنار گەورەترين براوەیە، نەك ئيمامئۆغلۆ.

ئەو نووسەرە بۆچوونەكەى زياتر روون دەكاتەوە و دەڵێت، "ميراڵ ئەكشنار دركى بەوە كرد كە  ئيمامئۆغلۆ سزا دەدرێت، بۆيە بەپەلە لە ئەنقەرەوە بەرەو ئيستەنبۆڵ بەڕێكەوت، رێگەى نەدا ئيمامئۆغلۆ بەهۆى گەشتى كليچدار بە تەنيا بێت."
ئيمامئۆغلۆ دەزانێت ئەو بڕيارە كۆتايى كارى سياسى نييە، بەڵكو سەرەتاييەكى نوێيە، كليچدارئۆغلۆ لە ئەڵمانيايە بەڵام دەيەويست لەو دوورەوە ئيدارەى ئەو رووداوە بدات، دووجار پەيوەندى بە ئيمامئۆغلۆوە كرد، بۆ ئەوەى كاريگەرييەكانى ئيمامئۆغلۆ و ميڕاڵ ئەكشنار كەمبكاتەوە، دەستبەجێش داواى لە سەرۆكى پارتە ئۆپۆزسيۆنەكان كرد، كۆبوونەوەى شەش پارتەكە رێكبخەن.
كاتێك ئيمامئۆغلۆ لە وتارى بەردەم جەماوەر گوتى، "ئيستەنبۆڵمان بردەوە، توركياش دەبينەوە." ئەو نووسەرە دەڵێت، "ئەو قسەى ئيمامئۆغلۆ ئاماژەيە بۆ ئەوەى دەبێتە كانديدى ئۆپۆزسيۆن." 
رۆيشتنى كليچدار ئۆغلۆ بۆ ئەڵمانيا كە پێشتر ئاگادارى ئەو دادگاييە هەبووە، بێهيوايى لەلاى دەنگدەرانى ئۆپۆزسيۆن دروستكردووە، بە بۆچوونى كوبڕا پار ئەو رووداوەى رۆژى چوارشەممەی رابردوو رێگە لەبەردەم سەرۆكى جەهەپە دەگرێت.

سەرچاوە: عربی 21