عەبدولرەحمان فەرهادی: داوا لە حكومەتی هەرێم دەكەین ئاوڕێك لە یەكێتی نووسەران بداتەوە
چرا یاسین: نوچە نێت
سەرۆكی یەكێتی نووسەرانی كورد لقی هەولێر لە دیمانەیەكی تایبەتدا باس لە مێژووی یەكێتی نووسەران دەكات، هاوكات ئاماژە بەوە دەكات، بەهۆی بڕینی هاوكاری دارایی مانگانەیان ناتوانن تەنانەت گۆڤاری (نووسەری كورد) دەربكەن، كە لە حەفتاكانەوە یەكەم ژمارەی لێ دەرچووە و داواش دەكات، "حکومەت ئاوڕێک لە یەکێتی نووسەران بداتەوە و مانگانەکەی بۆ بگەڕێنێتەوە، بۆ ئەوەی خزمەتی ئەدەب و زمان و کلتووری کوردی زیاتر" بكەن.
دەقی دیمانەكەی عەبدلڕەحمان فەرهادی، سەرۆکی یەکێتی نوسەرانی کورد- لقی هەولێر لەگەڵ نوچە نێت:
نوچە نێت: کورتەیەک لە مێژووی دامەزراندنی یەکێتی نووسەران، و ڕەوتی پەرەسەندنی ئەم ڕێکخراوە چۆن بووە؟
عەبدولرەحمان فەرهادی: یەکێتی نووسەرانی کورد لە (10)ـی شوباتی (1970)دامەزراوە، لەو ڕۆژانە (55) ساڵ بەسەر دامەزراندنی یەکێتی نووسەراندا تێپەڕی، یەکێتی نوسەران، ڕێکخراوێکی یان دەزگایەکی نەتەوەییە بایەخ بە ئەدەبی کوردی و ئەدەبیاتە جیهانی و کلتوور و ڕۆشنبیرییەکان دەدات لە هەرێمی کوردستان دا، لقی لە شارەکانی کوردستان هەیە لەو کاتەی کە دامەزراوە تا ساڵی (1980) ڕژێمی بەعسی لەناوچووی عێراق، ئەم ڕێکخراوەی هەڵوەشاندەوە، چونکە هیچ کەیفی بەم ڕێکخراوە ڕۆشنبیرییە نەدەهات، هەربۆیە بڕیاری هەڵوەشاندنەوەی دا، تا ئەوکاتەی ڕاپەڕینی بەهاری (1991) لەلایەن گەلی کوردەوە دژی رژێمی بەعس هاتە ئاراوە، ئیتر لە دوای ڕاپەڕینەکەوە (یەکێتی نوسەران) کۆنگرەی حەوتەمی خۆی لە شەقڵاوە ئەنجامدایەوە، دووبارە ئەم رێکخراوە بوژایەوە.
نوچە نێت: کاروچالاکییەکانی یەکێتی نووسەران زیاتر لە چیدا خۆی دەبینێتەوە؟
عەبدولڕەحمان فەرهادی: کاروچالاکییەکانی یەکێتی نووسەران لقی هەولێر، زیاتر خۆی لە بابەتە ئەدەبییەکان دەبینێتەوە چونکە ئەم یەکێتی نووسەرانی کوردە، یەکێتی سەرجەم نووسەرانی کورد نییە، بەڵکو لە ساڵی (1970) وە لەکاتی دامەزراندییەوە، دەستەی دامەزرێنەرانی بریتی بوون لە: شاعیر و چیرۆکنووس و ڕەخنەگری ئەدەبی. بۆیە یەکێتی نووسەرانی کورد، وەک لە پەیڕەوی ناوخۆی نووسراوە، (یەکێتی ئەدیبانی کورد) بەواتایی یەکێتی نووسەرانی کورد، هەربۆیە ئێمە زیاتر بایەخ بە شیعر و چیرۆک و ڕۆمان و پەخشانی ئەدەبی و دراما و شانۆنامە و ڕەخنەی ئەدەبی دەدەین. بەڵام لە کۆڕ و چالاکییەکانماندا بابەتە هەمەجۆرییەکانی دیکەی وەک( مێژوویی، کولتوری، نەتەوەیی)، و بەگشتی بابەت و بۆنە نیشتیمانیەکان لەبەرچاوگیراون، لەڕێگای ئەنجامدانی مەرسیمەکانیانەوە بەسەرمانکردونەتەوە. لەڕێگایی کۆڕ و چالاکییەکانماندا بێ جیاوازی نووسەر و ڕۆشنبیرانی کورد و کوردستانمان بەسەر کردونەتەوە هەر نووسەرێک ڕووی لە ڕێکخراوەکەمان کردبێت بەمەبەستی بەیانکردنی قەڵەمەکی بۆ خوێنەران. بۆیە بەپێیی پەیڕەوی ناوخۆ کوڕ و چالاکییەکان لەو چوارچێوەیە قەتیس نابێ تەنیا بابەتی ئەدەبی بێ، بەڵکوو زیاتر پەل داوێ بۆ بابەتەکانی دیکەش وەک ئاماژەمان پێدان.
نوچە نێت: لە پەرتووکی نووسەراندا زیاتر بایەخ بە کام لایەن و بابەت دەدەن؟
عەبدولڕەحمان فەرهادی: وەک باسمان کرد، لقی هەولێری یەکێتی نووسەرانی کورد، بەوپەڕی بێلایەنی کار و چالاکییەکانی خۆی دەکات، تا ئێستا هیچ کەس و حیزب و لایەنێک تەنانەت حکومەتی هەرێمیش تەداخوولی ئیشی نەکردووین، ئێمە سەربەست و ئازادانە ئیش دەکەین بەشێوەیەک ببێتە ڕەزامەندی سەرجەم خەڵکی کوردستان کارەکانیشمان زیاتر تەرکیز دەکاتە سەر بواری ڕۆشنبیری.
نوچە نێت: خاڵی جیاکەرەوەی ئێوە، لەگەڵ لقی- پارێزگاکانی تری کوردستان خۆی لە چیدا دەبینێتەوە؟
عەبدولڕەحمان فەرهادی: هەموو لقی پارێزگاکانی تری یەکێتی نوسەران بێگومان خاوەن سەروەتی ڕۆشنبیری خۆیانن، بەڵام ئەوەی لقی هەولێری یەکێتی نوسەران لە لقی پارێزگاکانی دیکەی کوردستان جیادەکاتەوە ئەوەیە، ئێمە چالاکییەکانمان ئەگەر بە ژمارە بێ زۆر زیاترە لە لقەکانی تر، کە هیوادارم هەموو لقەکانی یەکێتی نووسەرانی کورد، لە خزمەتی ئەدەب و زمان و وشە و ڕۆشنبیری کوردی بەردەوام بێت.
لقی هەولێری یەکێتی نووسەران، چالاکترین و پڕ بەرهەمترین لقە لە سەرجەم شارەکانی کوردستان، بە بەڵگەوە تا ئێستا لە (13) ساڵی ڕابردوودا زیاتر لە (800) کۆڕ و سیمینار و فێستیڤاڵ و بۆنەی لە شاری هەولێر سازداوە. چالاکییەکانیشی بە شێوەیەکی بێلایەنانەیە، ئێمە کە چالاکییەک دەکەین یان کۆڕێک دەگڕین بۆ ئازیزێک پەیوەندیمان بەوە نییە ئەم کەسایەتییە کێیە و سەر بە چ لایەنێکە چ ئاینێکە چ نەتەوەیەکە، بەڵکو مەبەستمان ئەوەیە بابەتە ڕۆشنبیرییەکە سوود بە ئامادەبووان بگەیەنێت کاری کلتووری خۆی و پەیامەکەی بگەیەنێت، بۆیە ئەم بێلایەنییەی ئێمە وای کردووە سەرجەم ڕۆشنبیرانی کورد لە پارچەکانی کوردستان لە شارەکانی تری هەرێمی کوردستان، ئەم (یەکێتی نووسەرانی کورد- لقی هەولێر)ـە، بە ماڵە گەورەکەی خۆیان بزانن و ناوی بنێن ماڵی نووسەران.
نوچە نێت: تا چەند لەگەڵ حکوومەتی هەرێمی کوردستان هەماهەنگن بۆ ئەنجامدانی کار و پڕۆژە ڕۆشنبیرییەکانتان؟
عەبدولڕەحمان فەرهادی: لەگەڵ حکومەتی هەرێم بۆ ئەنجامدانی کار و پڕۆژە ڕۆشنبیرییەکانمان تاچەند هەماهەنگین؟ بەداخەوە لەدوای شەڕی داعش، هێرشی بۆ سەر کوردستان و تێکشکانی لە (2014)ـەوە، تا ئێستا حکومەتی هەرێم ئەم مانگانەیەی هەمان بوو، لەوکاتەوە بڕیویەتی ئێمە بە توانایەکی زۆر کەمو لاواز، و کەم دەتوانین ئیشەکانی خۆمان بەڕێ بکەین بەڵام نەبوونی بودجەی مانگانە، بۆتە هۆی گرفتێکی گەورە بۆمان، کە ناتوانین کار و چالاکی و ڤیستیڤاڵی گەورە بکەین و ناتوانین گۆڤارەکەمان (نووسەری نوێ) کە لە سەرەتای حەفتاکانەوە دەرچووە و گۆڤارێکی زۆر گرنگ بوو، نەمانتوانیوە لە (2014)ـەوە ئیدامەی دەرکردنی بکەین و وەستاوە، هیوادارین حکومەتی هەرێمی کوردستان، ئاوڕێک لە یەکێتی نووسەرانی کورد بداتەوەو لەمەودوا مانگانەکەی بۆ بگەڕێنێتەوە، بۆ ئەوەی خزمەتی ئەدەب و زمان و کلتووری کوردی زیاتر بکەین و ئەو ویست و داخوازییەی هەمانە، لەو پڕۆژانەد جێ بەجێیان بکەین کە لەپلانماندان.
0 لێدوانەکان
Karla Gleichauf
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
M Shyamalan
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
Liz Montano
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment